Avûkatanê Rayberê Şarê Kurdî Abdullah Ocalanî ra Rêzan Saricayî derheqê tecrîdê giranî, tewirê dezgehanê huqûqî yê mîyanneteweyîyan û têkoşînê vera tecrîdî de ANFyî rê qisey kerd.

Saricayî ard ziwan ke tecrîdê Îmraliyî huqûqê zereyî û krîteranê huqûqê mîyanneteweyîyî binpay kenoı û vat: ''Seba ke no sîstem nêresa armancê xo tim ame girankerdene. Mîyanê 13 serran de Îmrali de 5 reyî pêvînayîşê avûkatan, 10 serran de 5 reyî zîyaretê keyeyan ameyî kerdene. 37 mengan ra nata zî qetî Birêz Ocalanî ra xeberêke nêna girewtene. Îmrali vurîyayo herêmêka winayêne ke tede cuya sîyasî û komelkîye qedîyaya. Ganî rewşa zîndanêkî goreyê rûmetê merdiman bibê. Nê prosesî de hinî yew meşrûtîya tepişîyayîşê Birêz Ocalanî nêmenda. Sîstemê Îmraliyî hem qedexeyê îşkenceyî hem zî azadîye binpay keno.

Derheqê Abdullah Ocalanî de ne huqûqê zereyî ne zî peymanê mîyanneteweyîyî nênê caardene. CPT ya heta Komîteya Wezîran a Konseya Ewropa û Mehkemeya Heqanê Merdiman nînan rê tim agahîyê serê tecrîdî dîyenê û waştişî yenê kerdene. Tewr peyên ma babeta tecrîdî viste rojdemê Neteweyanê Yewbîyayeyan. Uca de bire dîyaye ke 'cade avûkatî bieşkê pêvînayîş bikerê' dîyaye. La dezgehê Ewropa zî goreyê biranê xo tênêgêrenê. Ne Tirkîya goş dana pêşnîyazanê CPTyî ne zî CPT tesbîtanê xo de israr keno.''

Saricayî vist vîrî ke sîstemê Îmraliyî û rewşa Abdullah Ocalan tim rojdemê zîndanan de yo û vat: ''Tepişteyî grevê vêşanîye de yê. Tepişteyî nika mehkemeyan boykoy kenê û nêşinê pêvînayîşan û telefonan ser. Bi nê hawayî tepişteyî mojnenê ke tecrîdê Îmraliyî senî cîyaker o. Ganî şert û mercê tecrîdî bêrê famkerdene, empatî bêra kerdene.''