Hemsereka Pêroyî ya Komeleya Elewîyanê Demokratîkan (DAD) Kadrîye Dogan ANFyî rê qisey kerd.

Qetilkerdişê Rasa Al Alî yeno çi mana?

No rîyê rejîmê cîhadîstî yo tewr tarî yo ke yeno waştene ke Sûrîye de bêro awankerdene. Dişmenîya HTŞyî û awanîyê sey ci vera cinîyan, elewîyan û pêro aktîvîstan gef a. Qetilkerdişê Rasa Al Alî tena qetilkerdişê akademîsyenêke nîyo, nîşaneya waştişê çinkerdişê pêro cinî, elewî û şaranê bînan a.

Armancê HTŞyî çî yo?

HTŞ bi awankerdişê ters û dehşetî mîyanê komelî de sîstemê xo yê şerîatî awan keno. HTŞ armanc keno waranê komelî de cinîyan biqedîno û terefgîranê laîkîye bêveng bikero. Nê prosesî Afganîstan de bi Talîbanî dest pêkerd, Sûrîye de bi HTŞyî dewam keno. Hêzê emperyalîstî seba bêvengkerdişê têkoşînê demokrasîyî yê Rojhelatê Mîyanênî nê çeteyanê cîhadîstan şuxilnenê.

Modelê Rojawanî mîyanê nê tabloyî de cayêkê senî gêno?

Rojawanî cuyêka hempare û azadîgîra cinîyan awan kerde. HTŞ ney ra terseno. Çunke sîstemê ci de cinîyî îdeolojîya ci rijnenê. Coka kurd, elewî, şarê kêmî û terefgîrê laîkîye binê gefêkê pîlî de yê.

Şima têkilîya Tirkîya ya bi HTŞyî senî ercnenê?

Îqtîdarê Tirkîya paştî dano HTŞyî. La HTŞ seba Tirkîya zî gef o. Mezgo ke Sûrîye de şaranê kêman hedef keno siba do seba Tirkîya zî bibo tehluke.

Ganî vera na rewşe tewirêko senîn bêro mojnayene?

Rayaumûmîya demokratîke ganî bi raştîye bihesa. Erkê ma pêroyînan o ke haştîya zereyî ya Tirkîya bîyarê ca û demokrasîyî awan bikerê. Ganî komel wayîrê tewirê elewî, kurd, cinî û bindestan bibê û vera gefê qirkerdişî wurzo we. Bêvengîye do biba sebebê gefanê pîlêran! Ganî kesê wayîrwijdanî vera ney wurzê we.

Tewr peyên ti wazena seba Rasa Al Alî çi vaja?

Rasa Al- Alî tena akademîsyenêke ney, sembola xoverdayîş û azadîye bîye. Ez şexsê aye de pêro cinîyanê ke ameyê qetilkerdene yad kena.