Pawitox û merdimanê Wekîlê AKPyî yê ê çaxî Îbrahîm Halîl Yildizî 14ê hezîrana 2018î de qezaya Pirsûsî ya Riha de hêrişê keyeyê Şenyaşaran kerd û Haci Şenyaşar û wird lajê ci Celal û Adil Şenyaşar qetil kerdî. Hîrê rojî badê hêrişî Fadil Şenyaşar birîndar ame tepiştene. Fadil Şenyaşar badê 6 serran  4 mengan ame tehlîyekerdene.

Bi sebebê evrakan de xelatîye bîya Şenyaşar saetanê erey de ame tehlîyekerdene. Îdareyê zîndanî  îdîa kerd ke Şenyaşar yewna dosya ra tepişteyo la avûkatan îspat kerd ke wina yew dosya çin a. Dima ra muameleyê tehlîye ameyî destpêkerdene.

Fadil Şenyaşaro ke Zîndaê Tîpê Tyî yê Dîyarbekirî ra ame tehlîyekerdene dayîka ci Emîne Şenyaşar, birayê ci û wekîlê DEM Partî Ferit Şenyaşar û xeylêk kesî şîyî vera ci. Emîne Şenyaşar virar şîye lajê xo ra û hesir kerdî war.

Ferit Şenyaşarî ard ziwan ke  birayê ci bîlasebeb ame tepiştene û xeyrê têkoşînê dayîka ci ewro ame veradayene û vat: ''Sîstemê hukmî vera têkoşînê dayîka mi eciz mend. Nika sey birayê mi bi hezaran kesî bîlasebeb tepişte yê. Ma do semedê înan têkoşînî rê dewam bikerê. Têkoşînê dayîka mi semedê her kes bi roşnayî.''

Fadil Şenyaşarî zî vat: ''Êyê ke bîyî sebebê rişnayîşê hesaranê dayîka mi, ma înan rê heqê xo helal nêkenê.Têkoşînê ma do dewam bikero. Heta ewro kam ke paştî daye mi ez înan rê spas kena.''