Avûkatanê Baroyê Wanî ra Cemal Demîrî derheqê tecrîdê vera Rayberê Şarê Kurdî Abdullah Ocalanî de ANFyî rê qisey kerd.

Demîrî pare kerd ke Ocalan bi tecrîdî pêro heqanê xo ra bêpar yeno verdayene û vat: ''Seba ke Tirkîya endamêka Konseya Ewropa ya CPTyo ke dezgehêkê Konseya Ewropa yo, ganî verê îşkenceyî bigêro la îşkenceyî nimneno.  CPT ge ge Tirkîya zîyaret keno. Tewr peyên teşrîna verêne de zî Tirkîya zîyaret kerde. Goreyê agahîyanê ke eşnawîyayê, Birêz Ocalanî pêvînayîşê bi CPTyî red kerdo. Coka Buroyê Huqûqî yê Asrinî waşt ke CPT de pêvînayîş bikero. La CPTyî no qebul nêkerd û agahîyêke nêdaye înan.''

Demîrî vist vîrî ke CPT bi rayîrê raporan agahîyanê serê zîyaretanê zîndanî pare keno ney zî bi destûtê hukmatan beno. Demîrî vat: ''3yê teşrîna verêne ya 2020î ra nata Birêz Ocalanî de pêvînayîşo fîzîkî nêame kerdene. 25ê adara 2021î de bi rayîrê telefonî pêvînayîşêk ame kerdene la o zî nêmcet mendo. 20 mengî yo Birêz Ocalanî ra agahîyêke çin a. Coka qesawetî asta tewr berze de yê. CPT zî eşkerayîyêke nêdano.''

Demîrî ard ziwan ke CPT goreyê pozîsyonê xo yê huqûqî û sebebê xo yê estbîyayîşî tênêgêreno û vat: ''CPT kewto binê tesîrê hukmatan. Bêvengîya CPTyî nêna qebulkerdene. Ganî Tirkîya zî wextêkê kilmî de derheqê şertan û rewşa Îmraliyî de eşkerayîyêke bida û goreyê mewzûatî têbigêra.''