Wekîlê DEM Partî yê Çewlîgî Omer Faruk Hulakuyî proseso ke bi Vengdayîşê Haştîye û Komelê Demokratîkî yê Rayber Apoyî dest pêkerdo, ajansê ma rê ercna.

Hulakuyî bale ante ser ke seba prosesî sereraştkerdişê huqûqî şert ê û vat: ‘’Seba ke birêz Ocalan bi asanî tewrê nê prosesî bibo û mesele çareser bikero ganî zemînêkê huqûqî bêro awankerdene, kanalê dîyalogan mende bibê. Seba haştîya komelkîye nê gamanê bingeyînan ra yê.

Hukmatê Tirkîya ganî seba çareserîya meseleya kurdan gamanê zelalan bierzo. Hukmat bikero ke Birêz Ocalan bieşko her kes de têkilîyêka zelale virazo. ‘’

Hulakuyî pare kerd ke mesuldarîyê cidîyî kewenê milê hukmatî û vat: ‘’Haştîye bi tek terefî nêbena. Hetê kurdan tim vat ke seba haştîye amade yo. Nika wextê ci ameyo ke hukmat game bierzo. Gama verêne zî vurnayîşê şertanê Ocalanî yo, caardişê azadîya ey o. Ganî Birêz Ocalanî reyde kanalê dîyalogî bêrê akerdene. Hukmat na babete de ganî mesuldarîya xo bîyaro ca. Ameyoxê Tirkîya pabesteyê ney o.’’