Rayberê Şarê Kurdî Abdullah Ocalanî 22 serrî yo Zîndanê Îmraliyî de binê tecrîdî de yo. Bi bahaneyanê cîya-cîyayan destûr nêdîyeno ke Ocalan keye û avûkatanê xo bivîno. Abdullah Ocalanî reya verêne 27ê nîsana 2020î de heqê xo yê telefonî xebitna.

Dozgerîya Înfazî ya 2. ya Bursa 23ê êlule de Ocalan û 3 tepişteyanê bînan rê qedexeyê pêvînayîşî yê 6 mengan da. 'Xerîteya Rayîrî' ya Ocalanî ya ke 2009 de erşawitbi Mehkemeya Heqanê Merdiman a Ewropa (MHME) sey bahaneya qedexeyî ameye pêşkêşkerdene.

Tepişteyanê PKK û PAJKî vera tecrîdê Îmraliyî 27ê teşrîna peyêne de dest pê grevê vêşanîye kerd.

Wekîlê HDPyî Habîp Eksîkî derheqê mesele de ANFyî rê qisey kerd.

Eksîkî ard ziwan ke tecrîdê Îmraliyî îlegal o û vat: ''Ewro no tecrîd her ca ra vila bîyo. Eşkerayî, xebatê partîyan asteng benê, merdimê ke hukmat rexne kenê tepişîyenê û maruzê îşkence benê. Ewro şexsê Îmraliyî de pêro kurdî yenê tecrîdkerdene. No tecrîd haştîya şaran hedef keno û pê têkoşînê hemparî bin visîyeno.''

Eksîkî da zanayene ke weşîya Ocalanî û yê xeylêk tepişteyan hol nîya û vat: ''Zîndanan de tepişteyê kokim û nêweşê kronîkî binê tecrîdî de yê. Ganî îqtîdar û Wezaretê Edaletî nê kerdişî ra fek vera bidê. Ganî seba weşîya Ocalanî cade şertê hewcedarî bêrê caardene û keye û avûkatî ey bivînê. Ez sey doktor û wekîl vana ke ganî cade no tecrîd biqedo. Huqûq her kesî rê lazim o. Beno ke afernayoxê na bêhuqûqîye siba do maruzê ci bibê.''

Eksîkî grevê vêşanîye yê tepişteyan vist vîrî û îfade kerd ke par zî netîceyê grevê vêşanîye de dewlete zaf sozî dabi la nêardî ca. Eksîkî vat: ''Nê prosesê pandemî de ganî tepişteyî vera bidîyêne. Coka grevê vêşanîye seba tepişteyan tek çare ya. Ganî Wezaretê Edaletî cade waştişanê tepişteyan ser o pêvînayîşan bikero û tecrîd biqedno. Eke wina nêbo grevê vêşanîye do bibo sebebê felaketan. Ba babete de mesulîye yê hukmatî ya.''

Eksîkî peynîya qiseykerdişê xo de venga partîyan ê sîyasîyan, dezgeh û rêxistinan ê demokratîkan da ke wa derheqê na babete de hîsger bibê.''