Hetkara Hemserekanê Pêroyîyan ê HDPyî yê Komîsyonê Şar û Bawerîyan ra Mesuldare Tulaye Hatîmogullari bi eşkerayîyêke qurbanê Qirkerdişê Mereşî yad kerdî.

Eşkerayîye bi kilmî wina yo: ''19-25ê kanûna 1978î de Mereş de vera elewîyan, kurdan, çepgîran qirkerdişêk ame kerdene û netîceya nê qirkerdişî de bi seyan kesan dinyaya xo bedilnaye û bi hezaran kesî birîndar bîyî, bi seyan kargeh û keyeyî ameyî xerakerdene. Êyê ke xelisîyayî neçare mendî ke koç bikerê.

Netîceya qirkerdişî de beşêko girîng ê elewîyan şi, demografîya şaristanî vurîyaye. Hema zî hêzê dewleta xorine yê nê qirkerdişî nêameyî eşkerakerdene. Keye û merdimanê qurbanan ra uzr nêame waştene. Ganî dewlete uzrê xo biwaza. Ganî seba eşkerakerdişê qirkerdişî Komîsyonê edalet û heqîqatî yê Meclîsî bêro ronayene.

Ganî îqtîdarê AKP-MHPyî û Meclîs astengkerdişê roşnîkerdişê raştîye û qirkerdişî ra fek vera bido. Heta ke qirkerdişî nêrê eşkerakerdene, mesuldarî nêrê mehkumkerdene demokratîkbîyayîş mumkîn nîyo.

Îqtîdarî emser zî destûr nêda vîrardişê Mereşî û mojna ke hişmendîya qirkerdişî hema zî dewam kena. Ma do xîretê winasênî qebul nêkenê. Dewlete ganî nê qirkerdişî de têrî bêra. Ma pêro qurbananê qirkerdişanê Mereş, Çorum, Sêwas, Roboskî yad kenê.''