'Ganî her kes vera tecrîdî vengê xo berz bikero'

Avûkatê Abdullah Ocalanî Îbrahîm Bîlmezî vera binpaykerdişê heqanê merdiman ê Îmralîyî veng da dezgehanê mîyanneteweyî ke wa vera na neheqîye berpirsîyarîya xo bîyarê ca.

Avûkatanê Buroyê Huqûqî yê Asrinî dabi eşnawitene ke Rayberê Şarê Kurdî Ocalanî û tepişteyanê bînan ê Îmraliyî Omer Hayrî Konar, Hamîlî Yildirim û Veysî Aktaşî rê reyna cezaya dîsîplînî ameye dayene. Goreyê naye avûkatî 6 mengî û keyeyê tepişteyan 3 mengî nêeşkenê pêvînayîş bikerê. Avûkat Îbrahîm Bîlmezî derheqê cezaya dîsîplînî û binpaykerdişê heqan yê vera tepişteyanê Îmralîyî  de ANFyî rê qisey kerd.

Avûkat Îbrahîm Bîlmezî vat: ''Ma 22ê teşrîna peyêne de muracatê Dadgerîya Înfazî ya Bursa kerd û waşt wa cade pêvînayîş bêro kerdene. Ma muracat de vîst vîrî ke ma muwekîlê xo Birêz Ocalan û hîrê tepişteyanê bînan reyde 8 mengî nêeşkenê pêvînayîşan bikerê. Eynî roje lezabez cewabê muracatê ma dîya. Ma pê cewabî eşnawit ke cezaya qedexeyê pêvînayîşê semedê avûkatan a 6 mengan dîyaya la sebebanê naye ma hema zî nêzanê. Xora çîyê winayên ma verî  zî dîbî. No qerarêko keyfî yo. Qerar 12ê teşrîna verêne de ameyo girewtene la ma sey avûkatan newe eşnawetê, çîyo winayên nîno qebulkerdene. Eynî wextî de hîrê mengî zî qedexeyê pêvînayîşê keyeyan esto.

Tecrîdê Îmraliyî hinî bi mantik û huqûqî nîno îzahkerdene.  Muwekîlê ma yê ke zaf hole zanê nê qerarî sîyasî û keyfî yê narey hewce nêdîyo vera qeraranê qedexeyî îtîraz bikerê. Verî ma netîceya îtîrazanê muwekîlanê xo de qeraranê Îmralîyî ra bîyêne hayîdar. La narey ne Birêz Ocalan ne zî muwekîlanê ma yê bînan îtîraz kerdo. Beno ke înan sey protestoyî îtîraz nêkerdo la ma sey avûkatan do prosesê huqûqî bidê domnayene.''

Îbrahîm Bîlmezî dezgehê Ewropa yê eleqedarî zî rexne kerdî û wina dewam kerd: ''Ewro na bêhuqûqîya ke yena ciwîyayene de barê CPTyî zî esto. CPT goreyê raporê xo tênêgereno û peyê qeraranê xo de nêvindeno. Tirkîya Ewropa ra paştî gena û zextanê xo zêdînena. Badê nê qeraranê peyênan ma do reyna muracatê CPTyî bikerê. Ma, merdimê înan û şarê kurdî rewşa înan qesawet keno. Hewteyo ravêrte ma muracatê Wezîrîya Edaletî, Komîsyonê Heqanê Merdimanê Meclîsî,baroyan û xeylêk dezgehanê komelê sîvîlî kerd.

Tecrîdê Îmraliyî yeno manaya çaresernêkerdişê meseleya kurdî ke no zî Tirkîya demokrasîyî ra fîneno dûrî. Coka ganî her kes vera tecrîdî vejîyo. Eke tecrîd nêro wedaritene, rewşe do xirabêre biba û her roje noyê kesêkî/e bêro. Ganî dezgehê Ewropa yê eleqedarî şirê Tirkîya ser ke verê na bêhuqûqîye bêro girewtene. Konseya Ewropa û Mehkemeya Heqanê Mediman ê Ewropa ganî vera tecrîdî cade çîyêk bikerê. Huqûq û pêkerdişî yê semedê heqanê merdiman têna kagit ser o estê. Semedê muwekîlanê ma nê qerarê nînê caardene. Têna pê qiseykerdiş û rexnekerdişî nêbeno, ganî pratîk de game bêro eştene. Qesawetê ma her roje zêdîyenê. Ma do xebatanê xo bidomnê. Ma wazenê ke wa hinî na bêhuqûqîye biqedîyo.''