Qirkerdişê Mereşî 19ê kanûna 1978î de dest pêkerd û heta 24ê kanûne dewam kerd. Goreyê doneyanê fermîyan Qirkerdişê Mereşî de 111 elewîyî la goreyê şahîdan tewr tay 500 elewîyî ameyî qetilkerdene.

Rixmo ke qirkerdişî 43 serrî xo pey de verdayî fobîya elewîyan a vera dewleta tirke dewam kena. Hema zî elewîyî benê hedefê hêrişan. Serekê Pêroyî yê Komeleya Kulturî ya Pîr Sultan Abdalî (PSAKD) Ganî Kaplanî serrgêra Qirkerdişê Mereşî de ANFyî rê qisey kerd.

Kaplanî da zanayene ke Mereş, Çorum, Sêwas û Meletî de elewîyî bi hawayêkê komkî ameyî qirkerdene û vat: ''Nê şaristanan de elewîyî zaf û serdest bîyî. Ney zî tay kesî ecîz kerdî. Mîsal Mereş û Meletî de bazirganîye zêdêr hetê elewîyan ra ameyêne kerdene. O çax dewlete bi rayîrê nefermî ciwanê elewîyî şawitêne teberê welatî. Waştêne ke ê nê erdî biteriknê. Hesabê Qirkerdişê Mereşî pê sloganan nêno persayene. 13 serrî yo ma hê qurbananê qirkerdişî yad kenê. Mereş de belkî 30 hezar elewîyî estê la 200 kesî tewrê yadkerdişan benê.''

Kaplanî ard ziwan ke Qirkerdişê Mereşî travmayêka cidî ya û vat: ''Se ra 90 şahîdê Qirkerdişê Mereşî qisey nêkenê. Çunke na travma ya. Nê qirkerdişî de cîranan domanê cîranan ê xo yê elewîyan sere birnayî. kam eşkeno naye ser o qisey bikero? Nê metodê DAÎŞî ronayîşê komare ra nata estê. Ma emser reyna do Mereş de bibê û qurbanan yad bikerê. Ganî her kes paştî bido Mereşî.''