Avûkat Cemal Demîr û Serekê Şubeyê Wanî yê Komeleya Heqanê Merdiman (ÎHD) Mehmet Karataşî derheqê tecrîdê vera Rayberê Şarê Kurdî Abdullah Ocalanî de ANFyî rê qisey kerd. 

Avûkat Cemal Demîrî pare kerd ke tecrîd armanc keno ke tepişteyî dinya û komelî ra bêrê dûrvistene û vat: ''Oyo ke birêz Ocalanî rê yeno ferzkerdene tecrîdî ra hîna xorin û cîya yo. Ê manîfestoyê xelisnayîşê şaran ê Birêz Ocalanî ra tersenê. Sebebo esas ê tecrîdkerdişê Birêz Ocalanî no yo. 25ê adara 2021î ra nata Birêz Ocalanî ra xebere nêna girewtene. No sebrê komelî qedîneno. Ganî qetî pêvînayîşê bi Ocalanî bêro kerdene û rayaumûmîye de bêro parekerdene.''

Avûkat Demîrî rexne kerd ke CPT ganî detay û netîceyanê zîyaretê xo yê Îmraliyî rayaumûmîye de pare bikero.

Serekê ÎHDyî yê Wanî Mehmet Karataşî ard ziwan ke rixmê îtîraz, nêrazîbîyayîş û rexneyan zî tecrîd bi israrî dewam keno û no zî polîtîkayêka dewlete ya. Karataşî vat: ''Caardişê cezaya ke Ocalanî rê birîyaya, bi binpaykerdişê heqanê bingeyînan dewam kena. Astengkerdişê pêvînayîşanê bi keye û avûkatan, astengkerdişê heqanê bînan nê pêro kerdişî vera rûmetê merdimarîye yê. Coka bi nê hawayî sûc yeno kerdene.''

Karataşî îfade kerd ke Qanûnê Înfazê Ceza reyde çarçewa îdarenameyî de heqê pêro tepişteyan est o ke avûkatanê xo bivînê û vat: ''Bi bahaneya cezaya dîsîplînî pêvînayîşî yenê astengkerdene û nê cezayî zî avûkatan û keyeyî reyde nênê parekerdene. No zî nîşaneya xîretê qanûnkerdişê tecrîdî yo.''