Îdarekara Merkezê Pêroyî yê OHDyî huqûqnase Ekîne Yeter derheqê tecrîdê serê Rayberê Şarê Kurdî Abdullah Ocalanî û grevê vêşanîye yo ke 225 rojî yo vera nê yeno rayraberdene de ANFyî rê qisey kerd.

Avûkate Ekîne Yeter vist vîrî ke grevê vêşanîye tarîxî ra gama ke merdimî bêçare mamane de vejîyeno werte û vat: ''Tirkîya de 1950î ra nata na çalakîye tim û tim yena kerdene. Tirkîya de 3 serranê peyênan de pê rojeyê mergî û grevê vêşanîye prosesêko giran yeno ciwîyayene. No metod bitaybetî hetê tepişteyan ra yeno şuxulnayene. Tim gama ke çimeyê çareserîye gerîyene semedê akerdişê ci no metod yeno şuxulnayene.''

Yetere bale ante ser ke 107 zîndanan de 225 rojî yo grevê vêşanîye dewam keno û vat: ''Nika heme zîndanan de sey panc rojan dewam keno. Seba ke prosesê janî yo rîsko pîl esto la rixmê nayî çalakîye yena domnayene. Tay zîndanan de hûmara tepişteyan kêm a. Coka tay tepişteyî heta nika 4 rey kewtî grevê 5 rojan. Waştişê tepişteyan eşkera yo. Wa tecrîdê serê Birêz Abdullah Ocalanî bêro wedaritene û binpyakerdişê heqan ê zîndanan ê ke prosesê janî de zêdîyayî wa biqedîyê.''

Yetere ard ziwan ke tecrîd çend şino xorî beno  û wina dewam kerd: ''Hukmat ganî goreyê qanûnî têbigêro. Mewzuatî goreyê sîyasetî nêeşekenê berê bedilnayene. Madeyê 90. yê Qanûnê Bingeyî vano pêkerdişê mîyanneteweyî sey qanûnî yê ke ganî şertê ci bêrê caardene. La xora tay madeyî keyfî nênê caardene. Ganî Pêkerdişê Heqanê Merdiman ê Ewropa sey esas bêro girewtene ke morê Tirkîya binê ci de esto. Goreyê nê pêkerdişî merdim pê kam sûcî bêro sûcdarkerdene ferq nêkeno ganî heqê ci bêrê pawitene.''

Ekîne Yeter qiseykerdişê xo pê nêvatişan qedîna: ''Mehkemeya Heqanê Merdiman ê Ewropa û metînanê huqûqî yê mîyanneteweyî de tecrîd sey  îşkenceyî yeno pênaskerdene. Na rewşe zelal a. Şima nêeşkenê goreyê dewrî, şertanê sîyasîyî, prosesê şer û haştîye mewzûatê fermîyî bêrê caardene. No mewzûat ganî bêro caardene.  Waştişê heqdar ê tepişteyan ganî bêrê caardene. Prosesê 2018 û 2019î de  bi eynî waştişî bi hezaran bedenê xo mergî rê caverda û rîyê na bêçareyîye ra 9 kesan dinyaya xo bedilnaye. Seba ke eynî çî mebê ganî selahîyetdarî game bierzê û waştişê tepişteyan qebul bikerê.''