Seke zanîyeno Hukmatê Hewlêr û Iraqî Şingalî ser o peymanêke îmza kerde. Yeno vatene ke na peymane de hemkarîya DYA û dewleta tirke zî esta. 

Goreyê zanayîşan dewleta tirke xîret kena ke PDK û DYA zî tewrê projeyê xo yê Berê Sînorî yê Ovakoyî bikera û wina uca de ca biba. Seba nê projeyo ke Rojawan û Başûrî ser o gef o, gama verêne Şingal de erzîyaye.

Dewleta tirke, PDK û Iraq bi koordîneya DYA nê projeyî ser o xebitîyenê û yeno vatene ke proje game bi game yeno caardene. Dewleta tirke bi rayîrê nê projeyî wazena ke menfaatanê Iraq, PDK û DYA biresna yewbînan.

Dewleta tirke projeyê Berê Sînorî yê Ovakoyî serra 2017î de referandumê xoserîye yê Başûrî ra dima vist dewre. Proje sînorê Rojawan-Başûr û Vakurê Kurdîstanî ra dest pêkeno, Şingalî ra derbaz keno û heta Bexdadî dewam keno. 

Proje dima ke têkilîyê dewleta tirke û PDKyî sereraşt bîyî vindert la pêvînayîşanê dîplomatîkan ra dima mabênê Anqara, Bexdad, Hewlêr û Washingtonî de proje newe ra bi rojdem.

Serekê MÎTî Hakan Fîdanî hezîrane de zîyaretê Bexdadî kerd, Serekwezîrê Iraqî Mustafa Kazimî menga tebaxe de zîyaretê Washingtonî kerd, Serekê Herêma Kurdîstanî Nêçirvan Barzanîyî êlule de Anqara zîyaret kerde û dima zî Temsîlkarê Taybetî yê Sûrîye yê DYA James Jeffreyî Hewlêr û Anqara zîyaret kerdî. Yeno vatene ke proje nê zîyaretan de newe ra ame ercnayene.

Wextê nê zîyaretan de dewleta tirke hêrişê Şingal, Mexmûr, Heftanînî kerd.

Goreyê zanayîşan dewleta tirke seba projeyî soz dayo PDK, Iraq û DYA. Yeno vatene ke peymana Şingalî zî parçeyêkê nê projeyî yo.

Dewleta tirke Peymana Lozanî ra nata 100 serrî yo ke wazena xeyalê xo yê Mîsak-i Mîllî bîyarê ca û sînorê xo biresna heta Mûsil û Kerkûkî. Coka hedefê ci yê verênî kurd ê. Dewleta tirke bi nê projeyî armanc kena ke têkilîya mabênê Rojawan û Başûrî bibirna, peynîya xoserîya Şingalî bîyara, xo biresna Mûsil û Kerkûkî û wina Rojawan parçe bikera.

No proje her hetî ra seba kurdan gef o. Dewleta tirke dêsê sînorî (sînorê Vakur-Rojawanî de 832 kîlometre, sînorê Vakur-Rojhelat de 139 kîlometre), ra dima nika zî bi nê projeyî xîret kena ke sînorê Başûr û Rojawanî yewbînan ra cêra bikera.