Seba ke Wekîlê HDPyî yê Kocaeli Omer Faruk Gergerlîogluyî semedê wekîla verêne Aysele Tugluka ke Zîndanê Kandira de sey rehîne yena tepiştene verê zîndanî de eşkerayîye daye derheqê ci de hetê Serdozgerîya Komare ya Kocaelî ra cipersayîş diya destpêkerdene.

Gergerlîogluyî vera cipersayîşî nêrazîbîyayîş ramojna û vat: ''Mi sey yew hekîm û pawitoxê heqanê merdiman raporê birêz Aysele Tugluk yo ke vano wa înfaz bêro peydeeştene wend û dî ke rixmê naye Dezgehê Tibê Edlî bi qerarêkê sîyasîyî peydeeştişê înfazî red kerd. Ez şîya verê zîndanî û mi vat wa serebûta dîyîne ya Garîbe Gezera mebo. Vanê Gezere xo kişto. Xokiştiş bo zî rîyê depresyonî ra kerdo. Mi sey hekîmêk wina va. Ma têna vat wa Aysele Tugluk bêro veradayene û tepişteyê nêweşî bêrê tedewîkerdene, zîndanî ra cenazayî mevejîyê. Derheqê ma de xeylêk madeyan ra cipersayîş ame akerdene. No çîyêko eceb o. Hinî vatişê 'Wa tepişteyê nêweşî memirê' zî sey sûcî yeno vînayene.''