Wekîlê HDPyî Omer Faruk Gergerlîogluyo ke pê bira Mehkemeya Qanûnê Bingeyî vera dîya ANFyî rê qisey kerd. 

Gergerlîogluyî ard ziwan ke Mehkemeya Qanûnê Bingeyî pê na bire dersêk da Meclîsî û vist vîrî ke wekîlîya ci bi lezabezî amebî betalkerdene. Gergerlîogluyî vat: ''Ganî na bire ra dima ma şerm bikerê. Semedo ke mi binpaykerdişê heqanê merdiman eşkera kerdêne ez bîya hedefê îqtîdarî. Bi taybetî meseleya cigêrayîşê rûtî xeylêk sebrê înan qedîna. Înan wina ez eşta zîndanî. 

Ez pabeya ci ya ke wekilîya mi apey bêra dayene. Ez têkoşînê xo ra do dewam bikera, pê metodê sîyasetî binheyê heqanê merdiman ser o raywanîya xo rê dewam bikera. Ganî sey Enîs Berbereogluyî wekilîya mi bêra dayene. La belî nîyo. Çunke Devlet Bahçelîyî kombîyayîşê koma xo de mesaj da ke ganî ez nêra girewtene meclîsî.''

Omer Faruk Gergerlîogluyî îfade krd ke atmosfero nikayên ê zîndanan xirab o û bale ante qirkerdişê Denîze Poyraz û dewaya qefilnayîşê HDPyî ser. Omer Faruk Gergerlîogluyî vat: ''Nê çîyî newe nîyê. Ê nêwazenê meseleya kurdan bêra nîqaşkerdene, temsîlkerdene. Qefilnayîşê HDPyî çare nîyo. Sey vizêr ewro zî ma do pê nê ferasetî têkoşîn bikerê. Tîya de oyo girîng meseleya kurdan a. Ê xîret kenê ke Tirkîya de atmosferêkê xirabî û faşîzanî virazê. Coka hêrişê rojnamegeran kenê.

Ganî muxalefet vera nê hêrişan babetanê demokrasî û wijdanî de bi lezî bêro têhet. Heta no têhetamyîş nêro kerdene siba do ewroyî ra xirabêr bibo. Ganî muxalefet cîyatîyanê xo bido kişte û semedê têkoşînê hemparî bêro têhet.''