Cenazeyê 267 kesanê ke ameybî berdene bi Dezgehê Tipa Edlî yê Meletî goristanê bêkesan de ameyî definkerdene. Temsîlkarê MEBYA-DERî yê Meletî Yusuf Bulutî derheqê babete û zorîyanê ke keyeyan raîtê ci yenê de  MA rê qisey kerd.

Bulutî îfade kerd ke rîxmê testê DNA keyeyî nêeşkenê 3 û 6 mengan de cenazeyanê xo bigêrê. Bulutî vat:''Ma rê vanê ke netîceya testî hewteyêk de do eşkera biba la heta nika çîyêko winasên nêbi. Eşkerakerdişê testan ra dima cenazeyî yenê dayene TEMî la TEM astengan vejeno verê ma û bi hawayêkê keyfî cenazeyan nêdano. Cenazeyî heta ke dozgerîye destûr nêdera nênê teslîmkerdene. Goreyê qanûnê înan ganî mabênê 15 rojan de bêrê teslîmkerdene la ge ge no wext zêdîyeno beno mengêk û nême.''

Bulutî da zanayene ke tewr peyêne 3 cenazeyî ameybî teslîmkerdene keyeyan û vat: ''Hema 267 cenazeyî estê ke mîyanê înan de domanî  zî estê. Ganî keyeyî bêrê û numuneyê DNA bidê, wa wayîrê cenazeyanê xo bivejîyê. Ma sey MEBYA-DERî tîya de yê, çi destê ma ra bêro ma do seba keyeyan bikerê.''