'Grevê vêşanîye meşrû yo, tecrîd qanûnî nîyo'

Serekê ÎHDyî yê Wanî Mehmet Karataşî ard ziwan ke tecrîd vera qanûnan o û grevê vêşanîye yê vera tecrîdî zî heqêko meşrû û qanûnî yo.

Serekê ÎHDyî yê Wanî Mehmet Karataşî derheqê grevê vêşanîye û koçê afganan û qedexeyê çalakîyan ê 5 serran de ANFyî rê qisey kerd.

Karataşî bale ante grevê vêşanîye yê zîndanan ser û îfade kerd ke sebebo verên ê ney bêhuqûqîya Zîndanê Îmraliyî ya. Karataşî vat: ''Heqê pêro tepişteyan o ke avûkat û keyeyê xo bivîno. Komara Tirkîya vera Abdullah Ocaşanî bi hawayêkê bêhuqûqî tecrîdî ferz kena.2000an ra nata tecrîd yeno caardene. Nika pê bahaneya Korona şertê zîndanan ameyî girankerdene. Grevê vêşanîye heqêko meşrû yo. Coka cezayê dîsîplînî yê vera grevî huqûqî nîyê. Semedo ke grev biqedo ganî waştişê tepişteyan bêrê caardene.''

Karataşî dewamê qiseykerdişê xo de babeta multecîyan ê afganan ercnaye û îfade kerd ke Tirkîya de derheqê multecîyan de vengîyêka huqûqî esta. Karataşî vat: ''Ma vînenê ke Wan de heqê cuye yê multecîyan yenê binpaykerdene. Ma wazenê semedê pawitişê multecîyan ganî qanûnî bêrê caardene.''

Karataşî vist vîrî ke 5 serrî yo Wan de qedexeyê çalakî û aktîvîteyan esto û no qedexe kerdişê rewşa îstîsnatî yo. Karataşî vat: ''No zî binpaykerdişê heqê çalakî û aktîvîte kerdişê merdiman o. Ganî no qedexe cade bêro wedaritene  û merdimî bieşkê heqanê xo bişuxilnê.''