Vervatoxa HDPyî Ebru Gunay bînaya merkeze ya partî de kombîyayîşê çapemenîye kerd û rojdem ercna.

Qiseykerdişê Gunaye ra tay beşî wina yê: 

''HDP 8 serrî verê cû vera tekperestîye ronîya û bi hêvîya sîyasetî. Ewro HDP sînorê xo derbaz kerdî û bi vengê pêro welatî. Rixmê hende hêrişan zî ewro HDP hema zî payan ser o vindeno. Çunke bingeyê paradîgamaya HDPyî zixm o. HDP partîya rant û menfaatan nîyo. Ewro têna HDP vera faşîzmê AKPyî vindeno. Ma do bi heman qerardarî têkoşînê xo ra tawîz nêdê. Ma pê qerardar ê vera faşîzmê AKP-MHPyî blokê antî-faşîstî awan bikerê. Ma do vera tecrîdî têkoşîn bikerê û haştî, çareserî, demokrasî û edalet bîyarê ca. Bi na wesîle ma venga her kesî danê ke roja yewşemeyî tewtê şayîya ma bibê.

Bi bahaneya propagandaya PKKyî kayêkê tîyatroyî ame qedexekerdene. Nê îqtîdarî Azadîya Welat, Enstîtuyê Kurdkî, dibistanê kurdkî qefilnayî. Seba kurdkî qeydanê Meclîsî de vat ke ziwano ke nêzanîyeno. Îqtîdar dişmenîya kurdkî keno û bi qeyûman zî serra 2016î ra nata kurdkî keno hedef.

Derheqê îşkenceyê helîkopterî de hema zî tehqîqatêk nêdîya destpêkerdene. La rojnamegerê ke na xebere viraşte ameyî tepiştene. Bi nê hawayî sûcê xo mîyan kenê la bîlasebeb xîret kenê.

Ewro Musa Orhan do bêro hukmkerdene. Na dewaya pêro cinîyan a. Ma sey HDP na dewa do teqîb bikerê. Seba ke Musa Orhan ceza bigêro destê ma ra çira bêro ma do bikerê.

Îqtîdar verî baroyî kerdî hedef nika zî TTB kerd hedef. Her ca de bêhuqûqî hê hêrişî estî.

Ma do detayanê kombîyayîşê Meclîsê Partîye yê 10-11ê teşrîna verêne rayaumûmîye reyde pare bikerê. Nê kombîyayîşî de zî ma bi xurtî ser o vindertî ke blokê antî-faşîstî awan bikerê.''