Vervatoxa HDPyî Ebru Gunaye Buroyê Şêwirmendî yê Merkezê Pêroyî yê DBPyî de rojdem bi kombîyayîşê çapemenîye ercna.

Qiseykerdişê Gunaye ra tay noqtayê girîngî wina yê: 

''Qezayê trafîkî yê Dêrik û Dîlokî qirkerdiş ê. Seba ke tedbîrî nêameyî girewtene û asayîşê şarî pêşkêşê rantî ame kerdene nê qezayî qewimîyayî. Hêzê dewlete mîtînganê ma yê demokratîkan de pêro rayîran qefilnenê la wextê qezayanê wina pîlan de rayîran nêqefilnenê. Qeza de ê TIRan silê fosfatî kiriştêne la gereka madeyê winasênî rayîranê normalan de nêkirişîyê. Mesuldarê nê qezayan Cengîz Holdîng û îqtîdarê AKPyî yê.

Îqtîdaro ke 2011 ra nata destek dano cergan û hêrişê Rojawanî keno nika qala dîyaloganê bi Esadî keno. Îqtîdar pê nê waştişê dîyalogan raşt keno ke ê şerê Sûrîye de bin kewtê.  Nika bi mîlyonan kesî bedelê nê şerî danê. La îqtîdarî ney ra zî ders nêgirewto çunke hema zî bê kurdan wazeno Esad de dîyalogan bikero. Îqtîdarî verî kerd ke pê destê DAÎŞî û îşxalê erdê Sûrîye kurdan tasfîye bikero, nika zî wazeno binê nameyê dîyalogan de rejîmê Esadî reyde kurdan tasfîye bikero. Tirkîya do Esadî ra biwaza ke destkewteyê kurdan bêrê çinkerdene. No zî sîyaset nê şantaj û bazarîye yo.  Tirkîya wazena kurdan bêstatu verbida, Rojawan de aramîye çin bikera û zemînê hêrişanê neweyan awan bikera.  Eke Tirkîya Sûrîye de çareserîye û haştîye wazena o çax wa erdê Sûrîye ra veja. Ma Sûrîye de çarçewa çareserîya demokratîke ya meseleya kurdanê Rojawanî de terefgîrê muzakere û dîyalogan ê.

 Îqtîdarê Erdoganî hînî binê krîzan de yo, şîyayîşê ci nêzdî yo. Ma do bi hêzê xo yê rêxistinbîyayeyî, îtîfaqanê xo nê îqtîdarî heta peynî bişawê. Ewro kombîyayîşê îtîfaqî yê partîya ma est o. Netîceya kombîyayîşî de deklarasyon do rayaumûmîye de bêro parekerdene. 

Ma do vera tecrîd û şerî Roja Haştîye ya 1ê Êlule de meydanan de bi şîyarê 'Şer bin keno, haştîye ser visnena' mîtîngan bikerê. Ma venga şarê xo danê ke bi hêzêrî tewrê nê aktîvîteyan bibo. 1ê êlule de Hemsereka ma Pervîne Buldan tewrê mîtîngê Wanî, Hemserekê ma Mîthat Sancar tewrê mîtîngê Şirnexî bibê. Ma do vera şerî vengê xo berz bikerê.''