Vervatoxa HDPyî Ebruye Gunay merkezê partîya xo de kombîyayîşêkê çapemenîye kerd û rojdem ercna.

Gunaye bale ante hêrişanê îşxalî yê vera Rojawanî ser û vat: ''No şer vera estbîyayîşê kurdan, heq û destkewteyanê kurdan o. Bi nê şerî wazenê şorişê Rojawanî teslîmê hemkaranê xo yê cergan bikerê. Nê hêrişî şexsê kurdan de vera pêro komelî yenê kerdene. Îqtîdar seba ke weçînayîşan de ser bikewo nê hêrişan keno. Îqtîdarî hêrişê Taksîmî kerdo bahaneya nê hêrişan. Serekê AKPyî roja dişemeyî reyna kurdî tehdît kerdî û îdîa kerd ke tarîxê Tirkîya de têna 'edalet, rehm û tecrubeyê cuya hempare est ê.' La ey bi xo seba Terteletê Dêrsimî uzrê xo waştbi.

Nameyê HDPyî ser o ma reyna  rayaumûmîya demokratîke û şarê ma yê bindestî vanê ke ma do qetî teslîmê sîyasetê qirkerdiş û şerî yê AKP-MHPyî mebê. Sîyasetê vera şer û awankerdişê haştîye ma rê têkoşîno bingeyî yo. Ma do vera sîyasetê mergî yê îqtîdarî cuye bipawê.''

Vervatoxa HDPyî derheqê tecrîdê Îmraliyî de wina vat: ''Merg, rijîyayîş, xizanîye û şer polîtîkayanê tecrîdî ra qewimîyenê. Ganî cade Abdullah Ocalan de pêvînayîş bêro kerdene. Buroyê Huqûqî yê Asrinî da zanayene ke ê 20 mengî yo Birêz Ocalanî ra xeberêke nêgênê û Birêz Ocalanî êlula 2022yî de pêvînayîşê bi CPTyî red kerdo. No asta tehlukeyîne ya tecrîdî eşkera keno.Ma reyna venga CPTyî danê ke detayanê zîyaretê Îmraliyî wa pare bikero.

Tecrîd bîyo nasnameyê AKP-MHPyî. Vera tecrîdî têgêrayîş vera polîtîkaya şer û rejîmê yekkesî têgêrayîş o. Coka ma dibare kenê ke adresê sîyasetê demokratîk û çareserîye Birêz Ocalan o. Ma venga rayaumûmîya demokratîke danê ke seba ke tecrîdê Îmraliyî biqedo têbigêra. Ma venga Wezîrîya Edaletî danê ke wa cewabê pozîtîfî bida muracatê ma yê seba pêvînayîşî.''