Vervatoxa HDPyî Ebru Gunay Merkezê Pêroyî yê HDPyî de kombîyayîşê çapemenîye de rojdem ercna.

Qiseykerdişê Gunaye ra beşêk wina yo:

''Ewro Roja Domanan a Dinya ya. Tirkîya de domanî heqê ziwanê dayîke, perwerdeyê bêpereyî, heqê weşîye ûsn her heqî ra bêpar ê. Ma vera ê kesanê ke domana qetil kenê, îstîsmar kenê û keda înan wenê têkoşîn kenê.

Dewaya Kobanê û dewaya qefilnayîşî vera partîya ma dafik ê. Ma nê dewayan de nênê muhakemekerdene, ma hê înan muhakeme kenê. Dafikgerî vera xoverdayîşê ma bin kewenê. Ê têna vera partîya ma nê vera kurdkî, kulturê kurdan û hunerê kurdan têkoşîn kenê. Dewlete 100 serrî yo kena ke kurdan qir bikera. La ziwan, kultur û hunerê kurdan nê hêrişkerê ci do birijîyê. Hêrişê vera kurdkî hêrişê vera kurdan o.

 Xora dafikê înan zî hê înan xeniqnenê. Nika ê pê 50+1 qayîl nîyê. Her ke xeniqîyenê kombîyayîşan kenê. La çend kombîyayîşan zî bikerê şima do hînî nêeşkê mîyanê sîyasetê nê welatî de ca bigêrê. 50+1  do şima asteng bikero. Înan sîstemê 50+1 vera HDPyî na ro. La tarîxê tradîsyonê HDPyî pê xoverdayîşan pirr o. No tradîsyon mîrasê ma yo. HDP şar o, çimeyê ci cesaretê şarî yo.

Semedê 'helalîye waştişî' ganî verî soz bêro dayene ke xeletîyê verênî do nêrê kerdene. Ma sey HDPyî reyna veng danê ke wa Meclîs de Komîsyonê Têrîameyîşê bi Wextê Vîyarteyî û Cigêrayîşanê Raştîye bêro ronayene.

Dişmenîya înan têna vera Vakurî nîya. Başûr de zî vera kurdan hêriş û operasyonî estê. Armancê înan no yo ke kurdî wa erdê xo biteriknê û çin bibê. Goreyê îdîayan Tirkîya nê şerî de çeka kîmyewîye xebitnena. Ganî hukmatê Herêma Kurdîstanî nê îdîayan roşnî bikero û agahîyan bido. Pawitoxê heqanê merdiman ganî vera ney bêveng nêmanê û cigêrayîşî bikerê. Wa Ewropa zî derheqê babete de eşkerayîye bidê. Rêxistinea Heqanê Merdiman a Dinya bire daye ke heyetêk bişawa Başûrî û cigêrayîşan bikera.

Vîrê kurdan de hema zî birîna Helebçe esta. Sûcê merdimîye qetî vîran ra nêşinê. Ganî Tirkîya zî Herêma Kurdîstanî zî rojêke  nê îdîayan roşnî bikerê.''