Vervatoxa HDPyî Ebru Gunay merkezê pêroyî yê HDPyî de kombîyayîşêkê çapemenîye kerd û rojdem ercna.

Qiseykerdişê Gunaye ra beşêk wina yo:

''Operasyonanê qirkerdişê sîyasîyî de hemserek, wekîl, hemşaredar, îdarekar û endamê ma zî tede 16 hezar û 490 kesî ameyî destbendkerdene û 3 hezar û 695 kesî ameyî tepiştene. Tepişteyan ra 93 tenî hemserek, 194 tenî hemserekê HDPyî yê qezayan, 18 tenî wekîl, 23 tenî endamê MYKyî, 21 tenî endamê Meclîsê Partîye, 800 tenan ra zêdêr zî îdarekarê ma yê. Hema zî 7 wekîl û 15 endamê ma yê MYKyî rehîn ê. Dest nîya wekîlîya 13 wekîlan ma ser, 48 şaredarîyê ma hetê qeyûman ra ameyî xespkerdene, 37 hemşaredarê ma tepişîyayî. 18 hemşaredarê ma hema zî tepişte yê û 7 hemşaredarî zî hepsê keyeyî de yê. 82 endamê ma yê meclîsê şaredarîye wezîfe ra ameyî girewtene, 119 endamê ma yê meclîsê şaredarîye ameyî destbendkerdene û 2ê înan tepişîyayî.

Ablûqaya 14ê Kanûne ra 5 serrî vîyartî. Şirnex, Cizîre, Silopî, Sûr, Nisêbîn, Gever, Farqîn, Kerboran û Hezex de bi mengan ablûqa dewam kerd, bi hezaran sûcî ameyî kerdene la hema zî derheqê nê sûcan de ceza nêameye akerdene.

Embazê ma Selahattîn Demîrtaş û Fîgene Yuksekdag bi fermanê Erdoganî sey rehîn tepişîyenê. Erdogan hukmî rê fermanan dano hukm zî ano ca. Ma bi têkoşînê xo nê welatî û hukm bikerê azad.

Birêz Abdullah Ocalano ke 22 serrî yo binê tecrîdê giranî de yo prosesê çareserîye de mojna ke o eşkeno haştî û aramîye bîyaro Tirkîya. Çareserîya krîzê nikayênî yê Tirkîya zî wedaritişê tecrîdî yo. Ganî meseleyî bi dîyalogan bêrê çareserkerdene. Tepişteyan seba wedaritişê tedrîdî dest pê grevî kerd. Waştişê tepişteyanê grevê vêşanîye waşrişê ma yê. Seba ke waştişê înan bêrê caardene ma do heta peynî têkoşîn bikerê. Eke şertê çareserîye nêrê afernayene Tirkîya do nêeşka krîzî ra bixelisa. Mesuldarîyê ma yê pêroyînan estê. Ma bi nê mesuldarîyan têkoşîn û xoverdayîş pîlêr kenê.

Yewîya Ewropa bi serran kerdişê AKPyî seyr kerdî. Ma venga Yewîya Ewropa danê ke heqanê merdiman, demokrasî nêkera babeta bazirganîye.

Polîtîkayanê şaşan ê AKP-MHPyî ra pandemî de sîstemê weşîye rijîya. Ma reyna îqtîdar hîşyar kenê ke wa goş bidê dezgehanê weşîye. Pandemî de kedkar û karkerî mîyanê feqîrîye de mendî la sermayedar û patronî keyf kenê. Ma vera krîzê ekonomîkî reyna budçeya xo pêşkêş kenê. Vera sermaye ganî budçeya têdûşte bêra awankerdene.

Grevê vêşanîye yê zîndanan seba wedaritişê tecrîdê vera Birêz Ocalanî dîya destpêkerdene. Îqtîdarî xîret keno ke Trikîya bikero zîndanêkê pîlî û merdiman bênefes verdo. AKP Îmrali de heqanê merdiman binpay keno. Tepişteyî wazenê ke nê kerdişanê xiraban biqedê. Waştişê tepişteyan waştişê ma yê. Ma do verê vengdayîşê înan de bêveng nêmanê.''