Vervatoxa HDPyî merkezê pêroyî yê partîya xo de kombîyayîşê çapemenîye kerd û rojdem ercna.

Qiseykerdişê Gunaye ra tay noqtayê girîngî wina yê:

''Verê ma de weçînayîşî est ê. Îqtîdar pê polîtîkayanê xo yê îtîhatçîyan û pê têkilîya xo ya hêzanê tarîyan û mafya wazeno rejîmê tekcamêrdî mende bikero. Îqtîdar seba ke ser bikewo pêro pîsîyan keno. Îtîfaqê Mîletî zî mîyanê nîqaşanê namzetîya Serekkomarîye de teng bîyo. Ye plan û projeyê înan çin o. Ma têna erşawitişê Erdoganî derd nêkenê. Derdê ma caardişê demokrasî yo. Ez wazena tay nîqaşan safî bikera; ma qet yew partîye de bazarî nêkerde û nêkerê. Şar pê rayanê xo ma do biweçîno. Şar do ma bîyaro û ma zî do waştişanê şarî bîyaro ca.

Zanîyeno ke ma kamyew masa de yê. Wina yeno mojnayene ke seke HDP wazeno mîyanê Îtîfaqê Mîletî de cabigêro. Ma ne mîyanê Îtîfaqê Cumhurî de yê ne zî mîyanê Îtîfaqê Mîletî de yê ne zî ma paştî danê înan. Ma do Îtîfaqê Demokrasî reyde şorê weçînayîşan. Ma bi zelalî vanê ke ma do qetî paştî nêdanê namzetêkî/e ke goreyê ma nîyo/a. Ma partîya tewr pîle ya hîrêyîne ya. Wexto ke şima qala partîya ma kenê hedê xo bizanê. Eke wina nêbo şima do bedelanê pîlan bidê. Gureyê Merale Akşener nîyo ke cayê HDPyî dîyar bikera. Ma aye gureyanê ci yê tarîyan ra şinasnenê. A têna tarîtîya 90an wead kena. Gureyê HDPyî masaya to de çin o. Îtîfaqê ma îtîfaqê rayîrê hîrêyînî yo, îtîfaqê kede û demokrasî yo.

Embaza ma Semra Guzel pê şov û manîpulasyonan ameya tepiştene ke no zî operasyonanê hişmendîye yê AKPyî ra yew o. No şov dewamê derbeya AKP-MHPyî yê vera îradeyê şarî yo. Ma do qetî hesab nêdê nê îqtîdarê faşîstî û nêverdê ke embaza ma bêra krîmînalîzekerdene. Ma do qetî hesabê nê kerdişî bipersê. Darbeya 2ê Adare de zî wekîlê DEPî pê dîmenanê winasênanê ke ameybî servîskerdene tepişîyabî. AKP-MHP dewanê a hişmendî yo. Seyîd Rizayî ra heta Semra Guzel kurdî heta nika çok nêşîyî erdî ro û do nêşorê. Semra Guzel seba ke kurd a, cinî ya û endama HDPyî ya hedefê îqtîdarî de ya. La sere de Semra Guzel heta ke pêro temsîlkarê şarê kurdî azad bibê ma do têkoşînê xo rê dewam bikerê û îqtîdarî ra hesab bipersê.

Cûdîyê Şirnexî de çarçewa polîtîkayanê dewlete de qirkerdişê xoza yeno kerdene. Her roje binê çimdarîya leşkeran de Cûdî de darî birîyenê. Temmuza 2022yî de 14 herêmanê bînan ê Cûdîyî de birnayîşê daran dest pêkerd. Ma do vera nê qirkerdişî 17ê êlule de KCD, TJA, DBP û Têgêrayîşê Ekolojî yê Mezopotamya reyde bi şîarê 'Vera şer û qirkerdişê xoza şinê' Rayraşîyayîşê Cûdîyî bikerê. Ma venga şarê xo, sendîkayan, rêxistinan û şaranê Tirkîya danê ke tewrê nê rayraşîyayîşî bibê.''