Vervatoxa HDPyî Ebru Gunay Merkezê Pêroyî yê HDPyî de kombîyayîşê çapemenîye de rojdem ercna.

Qiseykerdişê Gunaye ra beşêk wina yo: 

''Ewro serrgêra bombakerdişê Rojnameyê Ozgur Ulke ya. Binê nê hêrişî de îmzaya Çîllere û MGKyî estbîye. A roje ra nata hêrişê vera çapemenîye qetî nêqedîyayî. Ez bi na wesîle şexsê Ersîn Yildizî de pêro şehîdanê çapemenîye yad kena. Ma hetê kedkaranê çapemenîye de yê. 

Krîzo ekonomîk beno pîlêr, xizanîye zêdîyena, merdimî vêşanîye de têrî manenê. Nê bobelatî hetê îqtîdarî ra ameyî afernayene. 

Bêhuqûqîye vila bena. Ewro Tirkîya de meseleya tewr pîle tecrîd o. Tecrîd tewr zaf bi meseleya kurdan eleqedar o. Ê senî ke kurdan û heqanê kurdan qebul nêkenê, tecrîdî xorin kenê. Îmrali de 22 serrî yo vera Birêz Ocalanî tecrîdêko giran esto. Nika reyna cezaya dîsîplînî dîyaye Birêz Ocalanî û dewlete nêverdena ke çew tede pêvînayîşan bikero. No nêno qebulkerdene.

Tecrîd tesîrê temamîya Tirkîya keno. Rejîmê Îmraliyî welatî rê vila beno. Îmrali sey laboratuwarî şuxilîyeno. Roje bi roje ma vînenê kke haştî û aramîya Tirkîya girêdayîyê tecrîdî yê. Ma reyna vanê ke cade wa berê Îmraliyî bêrê akerdene. Demokrasî û ameyoxê Tirkîya girêdayîyê tecrîdî yo. 

Ma 6 serran de dî ke wexto ke tecrîd yeno kerdene Tirkîya warê sîyasî, komelkî, ekonomî de çin bena. Na raştîyêka zelal a. Ma venga pêro welatan û CPTyî danê ke heta ke tecrîd nêro wedaritene nê welatî de çew aram nîyo. Seba asayîşê welatî ma do têkoşînê xo xurtêr bikerê.''