Gunaye: Rolê Abdullah Ocalanî nêeşkeno bêro peygoşkerdene

Vervatoxa HDPyî Ebru Gunay vat: ''Meseleya kurdan meseleya zafhetin a û babeta çareserîye de mumkîn nîyo ke rolê Birêz Abdullah Ocalanî bêro peygoşkerdene.''

Vervatoxa HDPyî Ebru Gunay derheqê nîqaşanê 'muxatabanê meseleya kurdan' de merkezê partîye de eşkerayîye daye.

Qiseykerdişê Gunaye ra beşêk wina yo:

''Meseleya kurdan meseleya esase ya Tirkîya ya ke heta na mesele çareser nêba Tirkîya nêeşkena biba demokrate. Waştişê kurdan zelal ê, muxatabê mesele zelal ê, rayîrê çareserîye zelal ê. Xora cayê çareserîya demokratîke Meclîs o. Abdullah Ocalanî zî na raştîye çend reyî arde ziwan. Ganî pêro gamî Meclîs de bêrê eştene. Semedê Ocalanî Meclîs têna nîqaşkerdişê mesele nê cayê çareserîya mende yo.

HDP partîya Tirkîya ya, sey pêro meseleyan meseleya kurdan de zî çareserîye xo rê wezîfe gêno. HDP wayîrê ê îradeyî yo ke na meseleya tewr pîle çareser bikero. Yanî HDP muxatabê na mesele yo. Meseleya kurdan meseleya zafhetin a û babeta çareserîye de mumkîn nîyo ke rolê Birêz Abdullah Ocalanî  bêro peygoşkerdene.

Hînî meseleya kurdan Tirkîya ra vejîyaye bîye meseleyêka dinya. Coka ganî pêro terefî na mesele çareser bikerê. Merdim nêeşkeno raştîya Birêz Ocalanî ya ke vatêne 'Îmkan bidê mi ez hewteyêk de eşkena na mesele çareser bikera' çin bihesibno. Coka nîqaşê muxatabîye qedîyayê. Ma sey HDPyî amade yê ke na babete de çi bikewo ma milî bikerê. Ma hêvî kenê ke nîqaşê çareserîye û muxatabîye yê nê rojanê peyênan berê dewrêkê neweyî abikerê.''