Vervatoxa HDPyî Ebru Gunay Buroya Îrtîbatî ya DBPyî  ya Amedî de eşkerayîyêka çapemenîye daye û derheqê rojdemî de qisey kerd.

Gunaye 3ê Kanûne Roja Astengdaran a Dinya vist vîrî û vat: ''Vizêr reyna îqtîdaro ke her warê cuya de bi vetişê astengan welat hînî kerdo ke tede nîno ciwîyayene, bi mesajanê xo dîrîyîya xo ramojna. Astengerî qalanê tîtîknayeyan, eşkerayîyanê bêsamîmîyetî nê îcraat pawenê.''

Gunaye bale ante serrgêra serrgêra 26. ya bombardumanê vera Rojnameyê Ozgur Ulke yo ke 3ê kanûna 1994î de ame kerdene ser û vat: ''26 serrî yo ke qetilkarê nê qirkerdişî bêrê pawitene zî ê vîjdanê şarî de mehkum bîyî û do rojêke verê edalet û hukmê raştî de bêrê muhakemekerdene.''

Gunaye ard ziwan ke kombîyayîşo verêne ê destmizê asgarî ewro yeno kerdene û vat: ''Ma wazenê ke nê kombîyayîşdan de temsîlkarê karker û kedkaran ca bîgerê ke qerarê raştî bêrê girewtene. Goreyê ma destmizê asgarî ganî 4000 bo û semedê nayî ma do bigurîye.''

Ebru Gunay hêrişê qirkerdişî zî ardî vîrî û wina dewam kerd: ''Têna des rojanê peyênan de nizdê 1000 kesî ameyî destbenkerdene. Xora Wezîrê Karanê Zereyî îtîraf kerd nê hêrişî sey konseptêk hetê înan ra yenê kerdene. Pê nê operayonan wazenê ke şarê kurdî sîyasetî ra bifînê dûrî. KCD adresanê muxatabê çareserkerdişê meseleya kurdî ra yew o.  Hedefkerdişê KCDyî bêçareyîye de israrkerdiş o.

Sîyasetê dişmenîye yê vera kurdan dewam keno. 30ê teşrîna peyêne de reyna yew domanêko kurd bi destê dewlete ame qetilkerdene. Walîyê Colemêrgî bi eşkerayîya xo cehd kerd ke qetilkerdişê Ozcan Erbaşî yê 16 serreyî meşru bikero. No qetilkerdiş dewamê qetlîamê Ceylane Onkol, Ugur Kaymaz, Berkîn Elvan, Alî Îsmaîl Korkmaz, Roboskî û Kemal Korkutî û sey xeylêk qirkerdişanê sîvîlan ê bînan o. Seba ke qetilkarê verênî nêameyî cazekerdene û qetilkerdişê neweyî qewimîyenê.''

Gunaye ard ziwan ke tepişteyanê sîyasîyan vera tecrîdê serê Rayberê Şarê Kurdî Abdullah Ocalanî û binpaykerdişê heqan ê zîndanan de 27ê teşrîna peyêne de dest pê girevê vêşanîye kerdo û vat: ''Îqtîdaro ke ganî tepişteyan rê bibo cewab bi hêrişanê neweyan cewab dano. Êyê ke vanê 'ma meseleya kurdî çareser kerda' ma înan ra vanê ke şima nêeşkenê goreyê hîşa xo çîyêk bikerî. Hadê xo bizanê. Şima ziwanê ci qedexe kenê, estbîyayîşê ci înkar kenê, şaredarîyanê ci xesp kenê, nasnameyê ci çîn hesibnenê, azadîya ci rê dişmenîye kenê û rayber û sîyasetmedaranê ci heps kenê û vanê qey şima mesela çareser kerda? Na mesela bi  dîyalog û muzakereyî yena çareserkerdene û no zî bi wedaritişê tecrîdê serê birêz Ocalanî beno.''