Vervatoxa HDPyî Ebru Gunay Merkezê Pêroyî yê HDPyî de kombîyayîşê çapemenîye de rojdem ercna.

Qiseykerdişê Gunaye ra beşêk wina yo:

''Ma 2021 de pîya kuçeyan de bîyî. Ma do serra 2022î de zî pîya kuçeyan de bibê. Nika ra ma serra newîye fîraz kenê. Ma serra newîye de pîya xo ver bidê û ser bikewê.

Tirkîya de polîtîkayanê AKP-MHPyî ra sebeb krîzêko ekonomîk o pîl esto. Eke îqtîdar nêeşkeno welatî îdare bikero wa îstîfa bike. Ma sey HDPyî vanê ke nê welatî de krîzê 'îdarenêkerdişî' esto. Çareserîya na mesele weçînayîş o. Muxalafet zî ganî ma reyde waştişê weçînayîşî bîyaro Meclîs. Ganî cade ceyran, awe, gazo xozayî beleş bê. Ma do sey HDPyî nê krîzê ekonomîkî de zî rolê xo bîyarê ca.

Goreyê raporanê ÎHDyî zîndanan de 2020 ra nata 59 tepişteyan dinyaya xo bedilnaye. Na menge de 7 cenazayî zîndanî ra vejîyayî. Zîndanî vurîyayî cayê mergî. La Wezîrîya Edaletî têna temaşe kena. Embaz, keye û ma zî zanenê ke mergê Vedat Erkmenî serebûtêkê xokiştişî nêbi. Ma venga Wezîrîya Edaletî danê ke derheqê mergê Erkmenî d eşkerayîye bida. Reyna wextê merasîmê definkerdişê Erkmenî de zî xeylêk binpaykerdişê heqan qewimîyayî. Cenazaya Erkmenî nêgêrîyaye zereyê camî. No kamyew dînî de esto? Nê kerdişê manenê kerdişanê DAÎŞî. Ma nînan qebul nêkenê. Hînî cînayetê serranê 90an zîndanan de qewimîyenê. Ma venga Wezîrîya Edaletî danê ke wa verê nê cînayetan bigêra û wezîfeyê xo bîyara ca.

Îzmîr de 3 karkerê sûrîyeyîjî hema ke weş bîyî ameyî vêşnayene û qetilkerdene. Dewaya Kitabxaneyê Umutî de sûcdarî ameyî  veradayene. Îqtîdarê AKPyî vergumanê JÎTEMî vera dayî. Îqtîdarê AKP-MHPyî bi xo bi 'dewleta xorine.' Vera na bêedaletîye têkoşînê ma do dewam bikero.

MA do 25ê kanûne de Riha de vera tecrîd û binpaykerdişê heqanê tepişteyan nawnayîşêk bikerê. 29ê kanûne de Îzmîr de roniştişê dewaya qirkerdişê Denîze Poyraz esto. Ma venga pêro cinîyan danê ke seba ke kiştoxanê Denîze ra hesab bipersê a roje Îzmîr de bibê. Meclîsê ma yê Ciwanan zî 26ê kanûne de Amed de Salona Kaplan Cityî de kongreya xo ya 3. do bikerê. Ma pêro ciwanan dewatê na kongre kenê ke Hemserekê ma Mîthat Sancar zî do tewrê ci bibo.''