Vervatoxa HDPyî Ebru Gunaye bi kombîyayîşê çapemenîye rojdem ercna.

Qiseykerdişê Gunaye ra beşêk wina yo: 

''Deklarasyonê Îtîfaqê Kede û Azadîye mîyanê komelî de kelecanêko pîl viraşt. Vera nê îqtîdarî tek alternatîf terefê demokrasî, azadîye û edalet o. Ma wazenê bibê hêzê rêxistinkerdeyî yê ê kesanê ke teberê sîstemî de mendê. Îtîfaqê ma seba hişmendîyêka newîye ame awankerdene. Ganî îtîfaqo ke paştî bigêro do îtîfaqê ma bibo. Berê ma seba pêro dezgeh û kesan akerde yê.

Rejîmê Îranî hêrişê partîyanê Rojhelatê Kurdîstanî keno. Rejîmê Îranî hetêkî ra xîret keno ke waştişanê demokratîkan ê şarê kurdî bifatisno û hetêkê bînî ra zî hêrişê Herêma Kurdîstanî keno. Netîceya nê hêrişan de bi desan kesî qetil bîyî û birîndar bîyî. Nê hêrişî vera aramî, haştî û îstîkararê herême tehluke yê. Sey HDPyî ma nê hêrişan şermezar kenê. Ma venga Hukmatê Iraqî, Herêma Kurdîstanî, Neteweyanê Yewbîyayeyan, Yewîya Ereban û dezgehanê bînan danê ke vera nê hêrişan tewirê xo bimojnê.

Îran û Rojhelat de çalakîyê vera qetilkerdişê Jîna Emînî dewam kenê. Îran se keno wa bikero do nêeşko bi hêrişanê xo verê waştişê azadîye yê şarî bigêro. Zerrîya ma hetê kesanê xo vera dîktatorîye xo ver danê de ya. Şarê kurdî yê Rojhelatê Kurdîstanî, şarê Îranî do têkoşînê xo de ser bikewê. Seserra 21. nika ra bîya seserra cinîyan.  

Seba ke maçê Bursaspor-Amedsporî de alaya rengîne ameye akerdene reyna vera kurdan nîjadperestîye ameye kerdene. Goreyê nê hukmatê kurdê tewr başî kurdê merdeyî yê. Ma venga kurdan danê ke vera ney nêrazîbîyayîşê xo mojna. Wa kurdî her ca de bibê yew, îtîfaqê xo yê neteweyî pîl bikerê. ''