Vervatoxa HDPyî Ebru Gunay Merkezê Pêroyî yê HDPyî de kombîyayîşê çapemenîye da û Bernameyê 'Têkoşînê Demokratîkî' eşkera kerd.  

Ebru Gunay ard ziwan ke înan 11ê teşrîna verêne de kombîyayîşê Heyetê Rayberdişê Merkezî yê 2. de nîqaşê hîrayî kerdî û pare kerd ke îqtîdar cewherê xo ra dûr kewto û ê do pê çalakîyanê xo îqtîdar bin bikerê.  Gunaye da zanayene ke çarçewa Bernameyê 'Têkoşînê Demokratîkî' de ê do vera asîmîlasyon û hêrişê îqtîdarî xo ver bidê û pê çalakîyanê xo têkoşîn bikerê. Gunaye venga rayaumîye da û vat: ''Têgêrayîşê ma ê hêvîdaran o û cayê ma qesran nîyo. Ma kuçeyan de yê. Ma wayîrê raştîye yê. Bêrê ma pîya îtîfaqê şaran awan bikerê. Ma nika ra dima prosesêkê bêmabênî yê çalakîyan danê destpêkerdene.''

Gunaye kombîyayîşê çapemenîye de derheqê tehlukeyê şerê zereyî de ke sebebê nêzdîbîyayîşê PDKyî ra qewimîya, qisey kerd.

Gunaye vat: ''Serebûtê ke Başûrê Kurdîstanî de qewimîyenê ma zaf xemgîn kerdî. Şerê zereyî nê îxtîmalê ci zî şarê ma qerqilneno. Şarê ma pabeyê yewî û azadîye yo. Heyf ke alozîyê mabênê kurdan do pêro destkeweteyanê kurdan bivisnê binê tehlukeyêkê pîlî. Kurdan seba nê destkewteyan zaf bedelî dayî. Tay dewletî wazenê kurdî bê heqan bibê û wazenê kurdan parçe bikerê. Coka mabênê kurdan de alozîyan vejenê. 

Ganî îdarekarê kurdan, partî û dezgehê kurdan vera nê polîtîkayan wezîfe û mesuldarîya xo bîyarê ca û dîyalogan xurt bikerê. Ganî partîyê kurdan ewro zêdêr ronayîşê yewîya neteweyîye ser o bixebitê. Nika wextê şerê zereyî nîyo. Wext wextê pawitişê destkewteyanê kurdan o. Wext wextê yewîya kurdan o.

Ma sey HDP venga terefan danê ke dîyalog û pêvînayîşan bikerê.  Wa serekê kurdan bibê rayberê yewîye. Seba haştî û aramîye sey HDP çi keweno ma milî ma do bikerê.''