Hemsereka KCDyî Leyla Guven zîndanê Xarpêtî ra Wezîrê Edaletî Abdulhamît Gulî rê mektubêke şawite, bale ante îşkence, polîtîkayanê xespî ser.

Guvene mektube nameyê 13 tepişteyan ê cinîyan ser o şawite. Guvene mektube de vist vîrî ke Gul şîyo Amed û uca de vato 'Ma verê pawitişê bi ziwanê dayîke akerd.' Guvene naye ser o wina nuşt: ''Kesê ke pereyê înan estê, eşkenê pereyê açarnayoxan bidê eşkenê bi kurdkî pawitişê xo bikerê. Nê mîsalî ra aseno ke şima çendêk verê pawitişê bi kurdkî akerdo. Hetê bînî ra mumkîn nîyo ke ma ê kesanê ke qiseykerdişê kurdkî ra ceza girewta xo vîr a bikerê. Ma sey tepişteyanê Zîndanê Xarpêtî semedo ke deyîrê kurdkî vatî û govende girewte ceza dîye. Teblîqatê ceza de semedê kurdkî 'ziwano ke nêzanîyeno' amebi nuştene. No zî hişmendîya vera kurdkî eşkera keno.

Îqtîdarê şima îqtîdarê qedexeyê kurdkî, ferzkerdişê hûmaritişê paykî, cigêrayîşê rûtî, îşkence, werdişê kede û heqî, xeripnayîşê înfazî û îqtîdarê bêhuqûqîyan o. Zîndanan de wextê grevê vêşanîye de şima ra veng nêvejîyeno. Zîndanan de sey cigêrayîşê rûtî zaf bêhuqûqî yenê kerdene la şima derheqê ney zî eşkerayîyêke nêdanê.

Ma musayî ke nameyê cigêrayîşê rûtî pê qerarnameyê Serekkomarîye bîyo 'cigêrayîşê bidetayî.' No xapînayîşêk o  û cigêrayîşê rûtî rê zemînêkê meşrûtîye amade keno. Werrekna wexto ke şima vat 'Hînî îşkence, faîl-î meçhulî çin ê' di reyî bifikîrayêne.

Eke wina yo bi mîlyonan kurdî pers kenê vanê 'Faîlê ê domananê ke her roje pê penzeran kişîyenê kam ê? Faîlê Ugur Kaymaz, Ceylane Onkol, Nîhat Kazanhan û ê domanan ê bînan kam ê?' Coka to zî Serekê Meclîsî zî zehmet kerd ameyî Kurdîstanî. Çunke hînî kurdî pê sîyasetê şima yê zûrayînî bawer nêkenê. Nê hemleyê şima semedê weçînayîşî yê û hetê kurdan de yew qîmetê ci çin ê. Wextê nê sîyasetê gemarinî qedîyayo, şima zî ney bizanê.''