Vervatoxê Partîya Çepe ya muxalefetê Almanya Gregor Gysiyî ANFyî rê derheqê hêrişanê îşxalî yê dewleta tirke yê vera Rojawanî de qisey kerd. Gysiyî Tirkîya şermezar kerde, waşt hêrişî biqedê.

Vervatoxê Partîya Çepe Gregor Gysiyî da zanayene ke Sûrîye ra vera Tirkîya qet yew hêriş nêameyo kerdene û vat: ''Coka no şer şerê xopawitişî nîyo. Hetê bînî ra Konseya Asayîşî ya Neteweyanê Mîyanneteweyîyan (NY) zî birêke nêdaye ke wa Tirkîya hêrişê herêmanê sînorê Iraq û Sûrîye bikera.''

Gysiyî vera pêvînayîşê Wezîrê Karanê Zereyî yê Tirkîya Soyluyî û Wezîra Karanê Zereyî Nancye Faeser şermezar kerd û paştdayîşê Faesere bi hêrişanê Tirkîya rexne kerd.

Gregor Gysiyî vat: ''Qiseyê Feasere raşt nîyê. Hêrişê dewleta tirke normal nîyê, goreyê huqûqê mîyanneteweyî zî nîyê.''

Gysiyî îfade kerd ke kurdan bi têkoşînê vera DAÎŞî destêko pîl dayo Almanya û waşt ke hêrişê vera kurdan bêrê vindarnayene. Gysiyî vat: ''Kurdan Iraq de êzidîyî zî pawitî, no serkewtişêk o ke ganî bêro fîrazkerdene.''