Zîndanê Tipê Fyî yê Tekîrdagî de tepişte Vedat Erkmeno ke cezaya ci ya muebedê giranî û 374 serran bibî hucreyê xo de merde ame vînayene. Îdareyê zîndanê saetanê şewe de xebere daye keyeyê Ermenî ke lajê înan xo kişto.

Merdimê Ekmenî ke Îstanbul de pîya bi avûkatanê ci, avûkatanê ÎHD û OHDyî şîyî Tekîrdag. La verî ke keye û avûkatî bêrê otopsîya Erkmenî ameya kerdene. 

Avûkatê OHDyî Gurkan Îsteklîyî medyaya dîjîtale ser o pare kerd ke înan saetan ra dima cenaza girewte û vat: ''Vedat Erkmeno ke çend rojî verî seba ke 'asayîşê ganê ci çin o' hucreyê yewkesî de ame cakerdene, bi eşkera ameyo qetilkerdene!'' Îsteklîyî da zanayene ke Erkmenî pêvînayîşê 17ê kanûne de vato ke o do gerreyê îdareyê zîndanî bikero.

Îsteklîyî pare kerd ke seba Erkmenî wesayîtê cenaza û tabutî nêdîyabî û nêrazîbîyayîşanê keyeyî ra dima herinda betanîya de tabut dîya. Keyeyê Erkmenî pê îmkananê xo cenaza arde Mudirîya Goristanan a Kuçukçekmece. Keyeyî waştêne ke cenaza verî bêro Komeleya Dîgorî ya Esenyurtî û dima bierşawo Qers.

La polîsan Esenyurt de keye asteng kerd, cenaza nêdaye û vat: ''Şima çira cenaza benê uja? Şima do serebûtêk vejê. Şima nêeşkenê cenaza berê komele.''

Keyeyî vera polîsan nêrazîbîyayîşê xo mojna û vat: ''Seba ke ma kurd ê cenazaya ma nêdanê ma.''

Polîsan îdîa kerd ke ferman dîyayo înan ke cenaza medê. Cenazaya Erkmenî hetê polîsan ra ameye remnayene. Dîya zanayene ke polîsî cenaza hê benê Weqfa Mehmetçîkî. Keyeyê Erkmenî zî ho cenaza teqîb keno.