Wekîlê HDPyî seba ke bale binacê tecrîdê serê Rayberê Şarê Kurdî Abdullah Ocalanî, rewşa tepişteyanê nêweşan û vêşnayîşê înfazan ser heyata çapemenîye ya meclîsî de ameyî têhet û heta Bêrê Dîkmenî rayra şîyî. Hemserekê Pêroyî yê KCDyî Berdan Ozturk zî tewrê rayraşîyayîşî bi. Polîsan verê wekîlan girewt la wekîlan rayraşîyayîşî rê dewam kerd.

Verê Wezîrîya Edaletî de raya hîrêyine polîsan verê wekîlan girewt. Wekîlan nêrazîbîyayîş mojna û rixmê heme astengîyan rayraşîyayîşî rê dewam kerd. Wekîlê HDPyî heta vere  Wezîrîya Edaletî rayra şîyî. Wekîlî Tulay Hatimogullari û Alî Kenanoglu seba randevu bigêrê şîyî zere. Badê pêvînayîşê bi Edaletê Wezîrîye  eşkerayîya çapemenîye ameye kerdene.

Serekwekîla Grûba HDPyî Meral Daniş Beştaş vat: ‘’Ma wezîrîye reyde tekîlîye na ro, wextê tewr kilmî de ma do Wezîrîya Edaletî dir pêvînayîş bikerê. Ewro seba ke kare  înan est o meqamê xo de nîyê. Binpaykerdişê zîndanan, îşkence, tecrit, surgun xeylêk binpaykerdişê heqanê bînî tim zêdîyenî û her hetê Tirkîya ra vera nê zulm neheqîyî qîrayîş berz beno. Ma bi xo zîndanî zîyaret kerdî, avûkat, rêxitinanê heqî,  dezgehanê huqûqî û boroyan de ma pêvînayîşî kerdî raşta zî rewşa zîndanan zaf giran a. Ma muracatê heme mekanîzmayanê dewlete kenê la cewabê ma nêdanê. Hema hema rojane zîndanan ra xeberê mergî yenê. Binpaykerdişê heqan û vêşnayîşê înfazî zêdîyenê . Ma kenê mesele çareser bikerê la xeymê îqtîdarî de nîyo.

Hetê bînî ra tecrîdê Îmraliyî xorîyêr beno. 25ê adara 2021î ra nata sere de Birêz Ocalan, Halîl Konar û tepişteyanê bînan ra xebere nîna girewtene. Muracatê avûkatan û keyeyan ê pêvînayîşî yenê redkerdene. Ma zaf hole zanê ke na polîtîkaya şerî ya.  Ma sey HDPyî têkoşînê haştîye kenê. Ma muracatê CPT, Mehkemeyê Heqanê Merdiman ê Ewropa kenê wa binpaykerdişê heqan biqedîyê. Şima morê xo dayo binê pêkerdişanê mîyanneteweyîyî ro. Ganî şima nika goreyê nê pêkerdişan têbigêrê. Tecrîd sûcê merdimîye yo.Tirkîya nê sûcî kena. 

Kesê ke 30 serrî yo zîndan de yê înan ra yeno waştene ke wa pîman bibê. Tehdit kenê û înfazanê înan vêşnenê. Tepişteyê nêweşî mergî rê ameyî caverdayene. 9 menganê peyênan de 62 cenazayî zîndanan ra vejîyayî. Zîndanî bîyî keyeyê megî. Tepişteyê nêweşî têna wazenê ke bêrê veradayene ke merdimanê xo ra xatir biwazê la no heqê zî destê înan ra yeno girewtene û cenazayê înan dîyenî keyeyanê înan. Qetilkar, tecawuzkarî pê qanûnê înfazî ameyî veradayene. Dayîkê tepişteyî pîya bi domananê xo zere de yê. Cinîyê extîyarî bi sebebanê sîyasîyan zîndan de yê.  Ma vengê nê qîrayîşî yê. No qîrayîşo bêveng nîyo. HDP vera heme neheqîyan vengê xo berz keno. 

Ma do wextê tewr kilmî de ma do Wezîrîya Edaletî reyde rî bi bî pêvînayîş bikerê. Ma do nê problaman bi xo înan rê vajê.  Hinî dayo çala qirrikî. Hinî ma nêeşkenê nê zulmî seyr bikerê. Ganî no problem bêro çareserkerdene. Ganî no îşkence biqêdîyo. Ganî tecîrd cade biqêdîyo. Wa hinî cenazayî zîndanan ra mevejîyê û înfazî mevêşîyê. HDP na babete de do peyser game meerzê, tim têkoşîn bikero.’’