Bajarê  Hambugrî yê Almanya de polîsan ewro serê sibayî eşt banê nuştoxe Anja Flach ser.  Ame zanayene ke seba ke Flache hesabanê xo yê medyaya sosyale de fotografê  gerîlayê HPGyî yo alman Jakob R. (Şîyar Gabar) yo ke şehîd bîyo pare kerd, sereştiş ame kerdene.

Jakob R. yo hamburgij par aşma temmuze de herêma Çarçella de hêrişê hewayî yê artêşa tirke şehîd kewt.

Anja Flach vera sereştişî nêrazîbîyayîş ramot û vat: Dewleta almane herinda vernîya îşxalê dewleta tirke yê vera Rojawanî giretişî de tîya polîtîkaya xo ya zextî domnena.

Anja Flach Kam a?

Anja Flach derheqê Kurdîstanî de kitaban nusena. Kitabê ci ‘Şorişê Rojawanî‘ 10 ziwanan de ame açarnayene. Anja Flacha ke mabenê 1995 û 1997î de koyanê Kurdîstanî de mende çimdarîyê xo kitab kerdî. Nuştoxa femînista ke bitaybetî derheqê şorişê cinîyan ê kurdan de bîya pîspore serranê peyênan de Almanya de sey qiseykerdoxe tewrê bi seyan panelan bîye. Flacha ke rojnamegerîye zî kena nuşteyê ci binîzamî sevîsê almankî yê ANFyî de vejîyenê.