Vervatoxa Komîsyonê Heqanê Merdiman û Huqûqî yê HDPyî, endama MYKyî û Wekîla HDPyî ya Êlihî Ayşe Acar Başaran bi wesîleya Qirkerdişê Zîndanan ê 19ê Kanûne eşkerayîyêk kerde.

Eşkerayîya nuştekîye de ame vatene: "20ê teşrîna verêna 2000î de zîndananê Tirkîya de tepişteyan vera zîndananê tîpê Fyî û bi 19 waştişan dest pê grevê vêşanîye kerdibi. Tay tepişteyan roja 45. a grevê vêşanîye de seba ke waştişê înan nêameyî ca dest pê rojeyê mergî kerd.Hetê îqtîdarê ê çaxî ra waştişê tepişteyan ameyî peygoşkerdene. 19ê kanûne de serê sibayî saete 04:30 de heman wextî de vera 20 zîndanan operasyonêk dîya destpêkerdene.

Nê operasyono de ke sey 'agêrayîşê cuye' ame namekerdene çekê giranî, wesayîtê karî, madeyê kîmyewîyî, helîkopterî û bombayê gazî ameyî xebitnayene. Zîndanî ameyî qulkerdene, ber û dêsê ci ameyî şikitene û bi hawayêkê barbarî hêrişê tepişteyan ame kerdene. Nê hêrişan de leşkeran, gardîyanan, polîsan bi hetkarîya kontragerîlayan 30 tepişteyî qetil kerdî û bi sayan tepişteyî zî birîndar kerdî.

Qirkerdişê 19ê Kanûne ra dima 19 serrî vîyartî la hema zî zîndananê Tirkîya de binpaykerdişê heqanê merdiman dewam kenê. Îşkence û muameleyê xirabî benê zêde, zîndanan de mergî benê zêdêr. Seba ke 19ê kanûnêka bîne nêba ganî pêro selahîyetdarî û îqtîdar naye xo rê sey dersêk bigêrê. Zîndanan de ê nêzdîbîyayîşê pêroyî yê ke vera rûmetê merdimîye yê cade bêrê qedînayene."