HDPyî ke bi wesîleya serrgêra darbeya leşkerî ya 12ê Êlule eşkerayîye daye û nê pare kerdî:

''Darbeya 12ê Êlula 1980î 41 serrî xo dima verdayî. Tesîrê na darbe ke  bi se hezaran destbendkerdişî, bi hezaran tepiştişî, îşkenceyî, surgunî, dardekerdişî, qetilkerdişî û înfazê bêhukmî qewimîyayî, hema dewam kenê. Darbe ra nata Qanûnê Bingeyî yeno binpaykerdene. Bi rejîmê yew merdimî sere de vera kurdan vera  şaranê Tirkîya bêhuqûqîye yena kerdene. Îqtîdarê AKP-MHPyî ewro caardişê 12ê Êlule dano domnayene. Îqtîdar bi hêrişanê xo  rojanê tarîyan ê 12ê Êlule ra zî aver şino.

Îqtîdar û hemkarê ci yê nimite û xorîyî pê çarenêkerdişê meseleya kurdî û şuxulnayîşê mekanîgê darbe ewro sey cûntayê 12ê Êlule têgêrenê. Talanê xoza, bêkarîye, feqîrîye, qirkerdişê cinîyan, qetilkerdişê domanan, îşkenceyê zîndanan, xespkerdişê şaredarî û parlamenterîye û dewayê qefilnayîşî sey bîlançoya zîhnîyetê darbe yê ewroyî pelanê tarîyan ê tarîxî de cayê xo girewt.

Rayîrê wedartişê nê zîhnîyetê cûntayî û darbeyan çareserkerişê meseleya kurdî û înşakerdişê cuya newî yo. Têkoşînê hemparî yê şaran do zîhnîyetê daybekerî rê bido vînîkerdene. Ma sey HDPyî veng dane, bêrê ma heme waran de semedê serfînayîşê îradeyê hemparî yê şaran pîya têkoşîn bikerê. Ma reyna zîhnîyetê darbekerî lanet kenê  û hemwalatîyanê ma yê ke dinyaya xo bedilnaye, ma înan bi hurmet yad kenê.''