Eşkerayîya HDPyî ra tay beşî wina yî:

“Serra 1993î de qezaya Pasûrî ya Amedî de rayberîya General Yavûz Erturkî de Tûgayê Bolû operasyonêk viraşbi û netîceyê operasyonî de 11 dewijê ke tepişîyayî, ameyî vînî kerdene.

Merdimanê vînkerdeyan bi sebebo ke tehqîqatan ra çîyek nêvejîyayo, Dadgeha Heqanê Merdiman ya Ewropa (AÎHM) rê muracat kerd. Dadgehe serra 2001î de Tirkîya sucdar dîye û waste wa Tirkîya na mesele ser o vindero û qetilkaran vejo orte.

Qewimîyayîşî ra 10 serrî dima herême de tayî esteyî ameyê vînayene û hetê Dezgehê Edlî Tibî ra ame tespît kerdene ke nê esteyî yê welatijê vînkerdeyan ê. Dima ra esteyî teslîmê dozgerîya leşkerî bîyî.

REJÎMO NEWE SUCANÊ REJÎMÊ KEHENÎ NIMINENO

Vizêr dewaya Pasûrî de sucdar Yavûz Erturko ke sucê ey eşkera yo, hetê dewlete ra ame pawitene û dewa de qerarê beraatê ey dîya. Serranê 90î de bi destê dewlete bi hezaran qetilkerdişî bîyî û rixmê naye dewayî zaf tay î û sucdarî her dewa de yenê berat kerdene. Rejîmo newe sucanê rejîmê kehenî nimineno.

Dewaya Pasûrî hêna eşkera nîşan daye ke dewlete senî sucdaran pawena û paştî dana înan. Qerarê na dewa nîşan dano ke ceza nêdîyena rêxistinê ke hetê dewlete ra yenî ronayene. Dewlete rêxistinanê tarîyan ra hesab nêpersena, paştî dana înan. No qerar ra yeno fam kerdene ke AKP bîyo ortaxê qetilkerdişanê Pasûrî.”