Komîsyonê Domanan ê HDPyî bînaya merkezî ya partîya xo de bi wesîleya 20ê Teşrîna Peyêne Roja Heqanê Domanan a Dinya kombîyayîşê çapemenîye kerd. Wekîlê HDPyî yê Şirnexî Huseyîn Kaçmazî ronayîşê komîsyonî bi eşkerayîyêke deklare kerd.

Kaçmazî qiseykerdişê xo de bi kilmî nê çîyî ardî ziwan: ''Tirkîya 14ê êlula 1990î de Peymana Heqanê Domanan a Neteweyanê Yewbîyayeyan îmza kerde. La krîterê heqê perwerdeyê bi ziwanê dayîke û krîterê bînî yê peymane nêrardî ca.Tirkîya de domanî asîmîle benê, kolonyal benê, dîyenê xebitnayene, koçber benê, maruzê tesîrê şerî benê, tepişte benê û perwerdeyê bi ziwanê dayîke nêgênê.

Ewro Tirkîya de tewr tay 10 mîlyon domanî nêeşkenê bi ziwanê xo yê dayîke perwerde bivînê. Ronayîşê komara Tirkîya ra nata domanê kurdî yenê asîmîlekerdene. Ewro 2 mîlyon domanî pê zorê pîlan xebitîyenê. Nika hezar û 896 domanî zîndanan de tepişîyenê û nê zîndanan de maruzê tacîz, îşkenve, kerdişê xirabî û şîdetî manenê. Reyna Kurdîstan de dewlete pê polîtîkayan domanan kena tîryakîyê madeyanê kundoxî. Domanî teyna key sey Ceylane Onkol bêrê qetilkerdene yan zî panzer bidê înan ro benê rojdem. Dewlete semedê pawitişê domanan mesuldarîya xo nêana ca. Komîsyonê Heqanê Domanan ê Meclîsî zî qetî wezîfeyanê xo nêano ca.

Hemvervatoxa Komîsyonê Domanan ê HDPyî Nuraye Turkmen zî îfade kerd ke înan semedo ke domanan  reyde meseleyanê înan çareser bikerê, azadbîyayîşê domanan de rol bigêrê komîsyono winasên naro. Turkmene vat: ''HDP do domanan reyde têkoşîn bikerê, azadîya domanan bîyaro ca.''

Turkmene da zanayene ke ê do çarçewa Komîsyonê Domanan de nê xebetan bikerê:

''-Komîsyonê îhtîsan ê domanan do Meclîs de bêro ronayene.

-Semedê ronayîşê 'wezîrîya domanan' xebatî do bêrê kerdene. 

-Semedê caardişê 'budçeya domanan'  xebatî do bêrê kerdnee.

-Rêxistin, dezgeh û baroyan reyde domanan ser o sempozyumêk do bêro kerdene û polîtîyaê domanan do bêrê awankerdene. 

-Semedo ke raporê 'Ercnayîşê Tesîran ê Domanan' (ÇOED) bêrê amadekerdene semedê bingeyê ci xebatî xo bêrê kerdene. 

-Bêro xîretkerdene ke Tirkîya krîteranê Peymana Heqanê Domanan bi temamî bîyara ca. 

-Semedo ke domanî zîndanan de nê merkezanê taybetan ê perwerdeyî de bimanê xebatî do bêrê kerdene.

-Semedo ke Dibistanê bi Wargehan ê Herêmî (YÎBO) bêrê wedaritene û Komîsyonê Têrîkerdişî bêro ronayene xebatî do bêrê kerdene. 

-Semedo ke Parlamentoyê Domanan bêro ronayene xebatî do bêrê kerdene.'' 

Turkeme ppê hesna ke înan semedo ke Tirkîya krîteranê Peymana Domanan a NYyî bîyara ca UNESCO û UNICEFî rê mektubî şawitî.