HDPyî bire daye ke semedo ke budçeya demokratîke û têdûşte bêra viraştene Tirkîya û Vakurê Kurdîstanî de 'Kombîyayîşanê Budçe' bikero. HDPyî startê 'Kombîyayîşanê Budçe' Agirî de da.

Eşkerayîya çapemenîye ra verî Berpirsîyarê Komîsyonê Ekonomî yê HDPyî Garo Paylan, Berpirsîyara Komîsyonê Kede ya HDPyî Şazîye Kose, Wekîla Îzmîrî Serpîle Kemalbay, Wekîlê Êlihî Necdet Îpekyuz, Wekîla Agirî Dîlane Dîrayet Taşdemîr û endamê û îdarekarê HDPyî bazarê heywanan de şar û heywandaran reyde ameyî têhet. Dima heyetî eşkerayîya çapemenîye daye.

Garo Paylanî heqê budçe yê şarî nêbo nêbeno û vat: ''Nê welatî de budçeya şarî dîyena terefgîranê îqtîdarî û terefgîranê rantî. Budçeya ke qesre de yena amadekerdene yê qesre ya. Ma semedo ke budçeya şarî virazê ameyî hetê şarî. Welatê ma de pêro çimeyî pêşkêşê terefgîranê îqtîdarî benê. Ma ewro Agirî de dî ke xizanîye resaya asta tewr pîle. Tîya de nêmeyê şaristanî bêkar o. Heywankarî nêeşkenê debara xo bikerê. Wa Erdogan qesre xo ra vejîyo û rewşa şarî bivîno. Ma heta 23ê teşrîna verêne kombîyayîşanê budçe rê dewam bikerê û semedê viraştişê budçeya şarî veng bidê. Ma na babeteb de venga her kesî danê ke tewrê têkoşînê ma bibo.''

Dîlane Dîrayet Taşdemîr bale ante ser ke budçeya şarî şina şer, qesre û zengînan û vat: ''Bazarê heywanan fotografê Agirî yo. Dewlete semedê Agirî gamêke nêerzena. Merdimî xizanî û bêkarîye ra koç kenê. Serrêke de 30 hezar kesan Agirî ra koç kerd. Nêverdenê şar heywankarîye bikero, şar vêşanîye rê ame terkkerdene. Na polîtîka polîtîkaya qastine ya dewlete ya. Ganî agirîyîjî naye qebul nêkerê.''