Wekîla HDPyî Gulîstane Kiliç Koçyîgît derheqê prosesê Kongreya Tabîye ya 4. ya HDPyî de ke 23ê sibate de do bêra kerdene ANFyî reyde qisey kerd.

Koçyîgîte bale ante konferansanê herêmîyan ê HDPyî ser û ard ziwan ke seba ke 'Îtîfaqê Demokrasîyî' bêro caardene ganî ê vînayîşê muxalefetê Tirkîya zî bigêrê. Koçyîgîte da zanayene ke ganî HDPyî hînî bi xurtî hewcedarîya îtîfaqê demokrasîyî bimojno û îqna bikero ke no îtîfaq do Tirkîya faşîzmê AKP-MHPyî ra bixelisno.

Koçyîgîte îfade kerd ke weçînayîşê 31ê adare û weçînayîşê 23ê hezîranî referansê girîngî yê û vat: ''Nê referansî nîşan danê ke eke muxalîfê Tirkîya pîya têbigêrê û hêzê xo bikerê yew eşkenê îqtîdar bin bikerê.''

Koçyîgîte eşkera kerd ke weçînayîşê 31ê adare û 23ê hezîranî seba ke weçînitoxê CHPyî HDPyî fam bikerê zaf girîng bîyî û vat: ''Weçînitoxê CHPyî sîyaset û armancê sîyasî yê HDPyî meraq kenê. Îtîfaqê demokrasîyî têna bi CHP nêno meydan. Terefgîrê tewr girîngî yê nê îtîfaqî zî cinî, ciwan, muxalîf, sendîka, rêxistinê demokrasîyî, dezgehê ekolojîkî û rêxistinê bawerîye yê.''

Koçyîgîte vist vîrî ke şarê Tirkîya HDPyî ra zaf çîyan paweno û ê zî kongreya xo de xîret bikerê ke cewab bidê nê pawitişan.

Wekîla HDPyî Gulîstane Kiliç Koçyîgît karê kongreya 4. ya HDPyî ser o vat: ''Qedînayîşê dîktatorîya şexsêkî armancê ma yo verên o. Seba naye zî di karê bingeyînî yê HDPyî estê:

* Yewîya Neteweyî ya Kurdan

* Îtîfaqê Demokrasîyî yê Tirkîya

Caardişê nînan zaf girîng ê. HDP do giranîye bido nê di bingeyan.''