Vervatoxê Komîsyonê Domanan ê HDPyî Huseyîn Kaçmazî derheqê merganê domanan de Merkezê Pêroyî yê HDPyî de kombîyayîşê çapemenîye kerd û tay doneyî eşkera kerdî.

Kaçmazî da zanayene ke tebaxe de hêrişanê droneyanê çekdaran de 8 domanî ameyî qetilkerdene û 24 domanî zî birîndar bîyê û nasnameyê nê domanan eşkera kerdî:

2ê tebaxe de Til Rifet de Fehîme Reşo, 16ê tebaxe de Qamişlo de Ehmed Elî Hisên û Ahneg Ekre Hisên, 16ê tebaxe de Kobanê de Ebid Mimehedn Heci (12), 18ê tebaxe de hêrişê vera merkezê perwerdeyê domanan  de Til Temir de Raniya Eta, Zozan Zêdan, Dîlan Izedîn û Diyane Elo ameyî qetilkerdene.

2ê tebaxe de Til Rifet de Dîna Osman (6), Mehmed Xerîb Mamo (6), Hisên Cemal Qasim (7), Sebah Henan Hemo (10), Avrîne Ebdurrehman Heyder (13), Orîvan Mihemed Ebdo (15); 9ê tebaxe de Mihemed Salih (12), Mîrah Selah (12), Îlane Selah (5), Bilind Mihemed Şemsedîn (16); 16ê tebaxe de Kobanê de Xelîl Cîhad Şêxo (2), Zirgan de Temîm Feyse (11), Efrîn de Ehmed Îmad Îbiş (15), 18ê tebaxe de Til Temir de 11 domanê kênayî hêrişê vera merkezê perwerdeyê domana de; 19ê tebaxe de Şehba de Hisên Xelef (13) birîndar bîyî.

20ê temmuze de Zaxo de de 3ê ci domanî 9 kesî ameyî qetilkerdene.

Kaçmazî îfade kerd ke nê domanî netîceya dişmenîya AKP-MHPyî ya vera kurdan de ameyî qetilkerdene. Kaçmazî ard ziwan ke domanî her roje kiştişî de têrî benê û vat: ''Neteweyê Yewbîyayeyî vera hêrişanê Îsraîlî yê serê Filîstînî vengê xo vejenê la vera AKP-MHPyî çîyêk nêvanê. No dirîtîye yo. Ma nê tewirê NYyî şermezar kenê. Ma venga înan danê ke wa vera hêrişan erkê xo bîyarê ca, derheqê merganê domanan de cigêrayîşan bikerê û vera nê hêrişan tewirê xo bigêrê. Komîsyonê Heqanê Domanan ê NYyî û Meclîsê Tirkîya wa cade kom bibê.

AKP-MHP ganî cade derheqê nê hêrişanê vera domana de eşkerayîyêke bido. Kesê ke nê sûcî kerdê wa bêrê cezakerdene. Ma do seba ke domanî nêmirê têkoşîn bikerê.''