Komîteya Rayberdişî ya Merkezî (MYK) ya Partîya Şaran a Demokratîke (HDP) derheqê hêrişê DAÎŞî yê vera Mexmûrî de ewro eşkerayîyêka nuştekîye daye.

Eşkerayîya HDPyî wina ya:

''Vizêr nêmroje ra dima DAÎŞ bi hawayêkê giranî hêrişê Kampa Mexmûrî kerd ke kampe binê ambargoyê Hukmatê Federalî yê Başûrê Kurdîstanî de ya û ge ge bena hedefê gefanê Tirkîya. Hêriş de kesêkî wefat kerd û 3 kesî zî birîndar bîyî.

No hêriş mojneno ke DAÎŞ newe ra  gefê DAÎŞî newe ra bi bitehluke. Netîceya têkoşînê bitesîrê QSDyî de DAÎŞo barbar tay mendbi ke çin bibo. La bi îşxalê vera Rojawanî DAÎŞ newe ra ganî bi. DAÎŞî bi hêrişê vera Mexmûrî kerd ke deynê xo bido hêzanê ke paştî danê ci. DAÎŞî verê cû bi hedefmojnayîşê nê hêzan hêrişê Kobanê kerdbi û nika zî bi heman hewayî bi hedefmojnayîşê înan hêrişê Mexmûrî kerd. Heman wextî de bi nê hêrişî DAÎŞî armanc kerd ke kurdan ra qesasê xo bigêro ke kurdan asteng kerd ke DAÎŞ dinya de vila nêbo.

Her çiqas hêrişkerê Mexmûrî DAÎŞ bo zî berpirsîyarê nê hêrişî hêzê herêmî yê ke her tim kurdan sey hedef mojnenê û bi îşxalê vera Rojawanî firsend da ke DAÎŞ ganî bibo. Berpirsîyarê bînî yê nê hêrişî zî hêzê mîyanneteweyî yê ke destûr da ke vera kurdan hêrişî bêrê kerdene. Ma nê hêrişê vera şarê Mexmûrî yo ke çend serrî verê cû tedaya dewleta tirke ra remayî û Mexmûr çolî ra vurna kerd warêkê cuye bi hawayêkê xurtî şermezar kenê. 

Vengdayîş

No hêriş mojneno ke hucreyê DAÎŞî yê pasîfî senî bi hawayêkê organîzeyî eşkenê têbigêrê. Ma venga hêzanê ke vera DAÎŞî şer kerdbi danê ke newe ra vera DAÎŞî têkoşîn bikerê, verî ke na rêxistine pîl nêba û dest pê çalakîyanê xo yê barbaran nêkera gamanê hewcedarîyan bierzê.''