Hemvervatoxê Şaran û Bawerîyan ê HDPyî û parlamenterê HDPyî yê Riha Nîmetullah Erdogmuşî ewro eşkerayîyêka nuştekîye weşanaye. Eşkerayîye de îfade kerd ke ê do nêverdê ke şarê êzidîyan erdê xo ra bêro koçkerdene.

Eşkerayîye de nê çîyî ameyî vatene:

"Êzidîyê dewa Kelhokî ya Bişêrî ya Êlihî yê ke serra 1992î de neçare mendî ke erdê xo biteriknê 27 serran ra dima agêrayî erdê xo. Serra 2001î de têkoşînê xo yê huqûqî de ser kewtî û erdê xo apey girewtî. La seba nê waştişê înan ci rê şîdet ame mojnayene û gef ro înan ame wendene. Verê cû zî êzîdîyanê dewa Bişêrî, Wêranşar, Midyad û Nisêbînî waşt ke abigêrê erdê xo la tay keyeyanê mafyatîkan ê ke xo peyê dewlete de nimnenê gef ro êzidîyan wend.

No hêriş hetê kamî ra beno wa bibo berpirsîyara ci dewlet a. Seba ke verê nê hêrişan bêrê girewtene ganî dewlete qanûnan bîyara ca. Seba ke êzidîyî abigêrê erdê xo ganî tedbîrî bêrê girewtene û asayîşê can û malê înan bêrê pawitene.

Ma venga pêro dezgehan, rîsipîyan, komeleyan, partîyan û roşnvîtran danê ke wa hêriş, teda û gefê vera êzidîyan vengê xo berz bikê.

Ma do nêverdê ke kesêk zî êzidîyan erdê înan ê qedîman ra bido koçkerdene."