Komîsyonê Heqanê Merdiman û Huqûqî yê HDPyî derheqê kerdişanê zîndanan de kombîyayîşê çapemenîye kerd. Mesuldarê Komîsyonê Heqanê Merdiman û Huqûqî yê HDPyî Serhat Erenî kombîyayîş de qisey kerd.

Erenî da zanayene ke tecrîdê Îmraliyî îşkence yo û no tesbît hetê raporanê CPTyî û biranê mehkeme ra ameyo kerdene. Erenî ard ziwan ke tecrîdê Îmraliyî yê vera Rayberê Şarê Kurdî Abdullah Ocalanî vilayê pêro zîndanan bîyo. Erenî vat: ''Her roje ma zîndanan xebera mergî gênê. Têna 2022 de 22 tepişteyan zîndan de dinyaya xo bedilnaye. Şert û mercê xirabî yê zîndanan kenê ke tepişteyî bimirê. Kerdişê xirabî, îşkenceyê îdareyanê zîndanî, Dezgehê Tipê Edlîyî yê ke raporê 'eşkenê zîndan de bimanê' danê nêweşan, Wezîrîya Edaletî mesuldarê nê mergan ê. Ma venga Wezîrîya Edaletî danê ke seba ke binpaykerdişê heqan biqedê têbigêra.''

Vervatoxê Komîsyonê Zîndanan ê HDPyî Alîşan Şahînî pê hesna ke 2022 ra nata 47 tepişteyan zîndan de dinyaya xo bedilnaya û vat: ''Tepişteyo nêweş Ehettîn Kaynar nêweşê kanserî yo la dezgehê dewlete tersî ra raporê seba veradîyayîşî nêdanê ci. Ganî Ehettîn cade bêro veradayene. 2021 de zî 51 tepişteyan dinyaya xo bedilnaye. Rojanê peyênan de seba ke roja veradîyayîşî ya tepişteyanê dewaya PKKyî bena nêzdî qanûnê înfazî qestî ra vurîyenê û înfazê nê tepişteyan yeno vêşnayene. No sûc o û ganî nê tepişteyî vera bidîyê.''