Serkwekîlanê qrûba HDPyî Merale Daniş Beştaş û Saruhan Oluç û wekîlan verê Serekîya Meclîsî de eşkerayîye daye. Polîsan destûr nêda çapemenî eşkerayîye teqîp bikerê û fotografê hêrişê ke tîya ameyî ronayene hetê polîsan ra ameyî arêdayene.

Oluçî vat: ''Wekîlê ma yê Igdirî Habîb Eksîk Geverê Colemêrgî de raştê hêrişê granî yê wezîfedaranê dewlete ame. Netîceya nê hêrişî de qorê ci hîrê cayan ra şikiya. Eksîk amelîyat bi, nika nêweşxane de yo. Heta ewro Serekê Meclîsî hema yew eşkerayîye nêdaya û hêriş şermezar nêkerdo. No yeno manaya qebulkerdişê hêrişî. Ma Serekê Meclîsî ra eşkerayîye pawenê. Eke paştî nê hêrişî nêdano wa şermezar bikero. Ganî vera nê hêrişî tewiro xurt bêro girewtene.

Walîyê Colemêrgî nêşarmîyeno vano wekîlî xo eşto erd. Hîrê cayan ra qorê wekîlî şikîyayo, amelîyat bîyo la o vano cara xo eşto erd. Walîyê Colemêrgî perwedeyê zûran danê şima? Şima her kesî sey xo zûrker hesibenenê. Eke cesaretê to est o dîmenê ke destê to de yê bimojnê ra. Dîmenê polîsan, dîmenê mobeseyan. Walî xora wina yo. Sereyê ci de Wezîrê Karanê Sûcî Suleyman Soylu est o. Ewro reyna wekîlanê ma rê heqeret kerdo. Tewrê heme sûcdaran fotografê ci est ê. Talîmatê şiknayîşê lingî zî ey dayo. Cêrî ra heta corî rêzila sûcî est a. Nika Soyluyo ke heme karanê xirabinan keno, qala demokrasîyî keno.

Hêrişê Geverî plankerde, zanaye ame kerdene. Verî heme hemwelatîyî û kamerayî fînayî dûrî dima ra wezîfedaranê dewlete hêrişê wekîlanê ma kerd. Amîrê asayîşî talîmatê hêrişî dayo. Wekîlanê ma pê goşanê xo eşnawito. Gama ke înan muzakere kerdêne hêriş ameyo kerdene. Wekîlê ma yê ke ginayî erd ro ameyî paykerdene.  Babete wina zelal a. Ganî heme partîye sîyasîyî vera nê tewir bigêrê.

Verî zî vera wekîlanê ma hêrişê cîya cîyayî ameyî kerdene. Na nuqtaya tewr lewe ya.  Wa barcî partîyê sîyasîyî mevajê asayîş hêrişê wekîlanê ma keno, heqaret keno. Êyê ke vera hêrişê ke ma rê beno vengê xo nêvejenê eke wekîlanê ci rê qale bêro vatene hinî nêeşkenê cewab bidê.  Eke partîyê muxalefetî û îqtîdarî sîyasetê demokratîkî rê hurmet kenê wa bêveng memanê. Bêveng memanê. Beno ke heta ke şima qale bikerî çîyêko giranêr bibo.''

 Badê eşkerayîye wekîlanê HDPyî dovîze ke kiriştene û serê ci de fotografê hêrişî estbî, verê Serekîya Meclîsî de nayî ro la polîsan lezabez arêdayî.