Meclîsê Partîye (MP) yê HDPyî netîcenameyê kombîyayîşê 10-11ê êlule eşkera kerd.

Netîcename de bale ameye antene ser ke îqtîdarê AKP-MHPyî Başûr û Rojawanê Kurdîstanî de hêrişê destkewteyanê kurdan keno û seba ney bazarîye keno. Netîcename de ame waştene ke wa dewleta tirke erdê kurdan û ereban ra vejîya.

Netîcename wina dewam keno: ''Îqtîar hende zulmê kurdan keno ke esteyanê domanan zereyê tewreyî de dano babîyanê înan, goran texrîb keno, heqê definkerdişî yê merdiman asteng keno. Bêguman mîrazê nê îqtîdarî dişmenîya vera kurdan o. Îqtîdar pê tecrîdê vera Abdullah Ocalanî dinya ser o sîstemê îşkenceyî yo bêmîsal awan kerdo. Nê tecrîdî ra meseleya kurdan, demokratîkbîyayîşê welatî û haştîye bêçare verdîyenê. La eke tecrîd bêro wedaritene rolo heyatî û girîng ê Ocalanî do bêro dîyene. Ganî Tirkîya heqê hêvîye yê Ocalanî bîyara ca. HDP heta peynî seba ney xebatanê xo rê dewam bikero.

Şer têna tesîrê şaran nêkeno verê talanê xoza zî akeno. Ma 17ê êlule de vera qirkerdiş û talanê xoza bi beşdarîya rêxistin û têgêrayîşê xoza Rayraşîyayîşê Cûdîyî do bikerê.

Krîzê ekonomîkî û vaybîyayîşan ra şarê Tirkîya hê kewenê zimistanêkê zehmetî. Şarî mîyanê xizanîye û vêşanîye de yê la qesre mîyanê bêusûlîyan de ya. Îqtîdar pê pereyo ke şarî ra diznayo mîyanê luksî de ciwîyeno. Ma do vera nê sîstemê ekonomî edaletî awan bikerê ke tede çew do vêşan û teber de nêmano.

Wextê îqtîdarê AKP-MHPyî de şîdetê vera cinîyan, cînayetê cinîyan û destsernayîşê destkewteyanê cinîyan resayî asta tewr berze. Îqtîdar keno ke vengê pêro cinîyan ê xoverdayoxan bibirno. HDP do Peymana Îstanbulî ra û destkewteyanê cinîyan ra fek vera nêdo. Embaza ma Semra Guzela ke bi hawayêkê îlegalî tepişîyabî, îradeyê cinîyan a. No feraset tedaker do nêeşko îradeyê ma teslîm bigêro.

Serrgêra 42. ya Derbeya 12ê Êlule de feraseto darbeker dewam keno. Îqtîdar pê qeyûman, dezgehanê muhakemekerdişî û tedayan nê ferasetî ano ca. La îqtîdarê AKP-MHPyî zî do sey darbekeranê bînan ser nêkewo.

Welat prosesê weçînayîşî de yo. Dewaya Kobanê û dewaya qefilnayîşê HDPyî dewam kenê. Seba ke komelî têna meverdê ma xebatanê xo rê do dewam bikerê. HDP azadî, demokrasî, edalet û têdûştîye ser o ronîyayo. Partîya ma vera darbeyan do biba garantora demokrasî û azadîye.

Ma Rayîrê Hîrêyînî de seba çareserîya meseleya kurdan û vera cîyakerîya serê bawerîyan esasê kede, azadî û têdûştîye de xo rêxistin bikerê. Îtîfaqê Kede û Azadîye 24ê êlule de do rayraşîyayîşê demokrasî yê şaran bido destpêkerdene û xerîtaya xo ya rayîrî eşkera bikero.

Bi tecrybeyanê xo yê tarîxîyan, bi cesaret û hêvî ma do pêro şaranê Tirkîya û bindestan reyde şorê û pîya ser bikewê.''