HDPyî bi wesîleya 4ê teşrîna peyêne ya 2016î eşkerayîyêka nuştekîye daye. Eşkerayîya HDPyî bi kilmî wina ya:

''Darbeya sîyasî ya 4ê teşrîna peyêne ya 2016î ra 4 serrî derbaz bîyî. Hemserekê ma yê verênî Selahattîn Demîrtaş û Fîgen Yuksekdag û bi desan parlamenterî, bi seyan hemşaredarî û bi hezaran endamê partîya ma bi hawayêkê îlegalî ameyî tepiştene. Îradeyê şarî nêame şinasnayene. Pêro krîterê qanûnî ameyî binpaykerdene.

Na darbeya sîyasî ya ke hetê AKP-MHPyî ra amebî kerdene, 4 serran ra nata dewam kena. Na darbe sîyaseto demokratîk, partîya ma û bi mîlyonanê dildarê partîya xo rê kerdî armanc û îradeyê înan nêhesibnayî.

Na darbe tesîrê pêro komelî kerd. Êyê ke çim û goşê xo na darbe rê girewtî, ewro bîyî hedefê na darbe. 4 serran ra dima ewro ma reyna vînenê ke seba menfaatanê xo xeylêk terefan paştî daye AKP-MHPyî û pêro erjê merdimîye û demokratîkî kerdî qurbanê nê menfaatan. Ganî bêro zanayene ke erjê demokratîk û merdimîye qet nêbenê babeta bazarîye.

Her çiqas hêrişê mekanîkê darbe dewam kenê zî ma bin nêkewtî. Eqsê ci warê sîyasetê demokratîkî ewro bi îradeyê şarî zêdêr payan ser o yo. Pratîkê darbeyo ke 4 serrî verî dîya destpêkerdene, şexsê partîya ma û îradeyê weçînitoxanê ma de sîyaseto demokratîk hedef kerd. Darbeyanê sîyasîyan îradeyê ma nêşiknayî, rayraşîyayîşê ma yê azadî û hêvî dewam keno. Yew meşrûtîyetê mekanîkê darbe nêmend. Hêzê totalîterî zî hînî paştî nêdanê AKP-MHPyî. Hîşmendîya nê îqtîdarî têna seba Tirkîya nê pêro dinya tehluke ya.

Ma vera darbe bin nêkewtî û têkoşînê ma heq û meşrû yo. Ma heqdar ê û heta ke sere de sîyasetmedarê ma yê rehînî û pêro dildarê sîyasîyî azad bibê têkoşînê ma do dewam bikero. Ameyoxo roşnî ê ma yo, ameyoxo demokratîk ê şaran û îradeyê  hêzan ê demokratîkan o.''