Hemserekanê HDPyî Pervîne Buldan û Mîthat Sancarî mesajê serrneweyî da.

Hemserekan mesajê xo de pare kerd ke serra 2020î bi cîyakerî, janê Korona, tecrîd, neheqîye, bêkarî, xizanî, binpaykerdişê heqanê merdiman û têkoşîn û xoverdayîşî derbaz bîye. Mesaj de ame parekerdene ke hîşmendîya otorîter û totalîtere pêro cografya girewte binê ablûqa la reyna zî ê pê kulturê têkoşîn û paştdayîşî serra 2021î pêşwazî kenê.

Mesaj wina dewam keno: ''Ma her serebût de zêdêr nêzdîyê yewbînan bîyî û warêkê hemparî de ameyî têhet. Ma pê bawer ê ke serra newîye do biba serra têkoşîn û xoverdayîşî yê vera hîşmendîya AKPyî. Ma do 2021 de temsîlkarîya wayûbiratî, têdûştî, haştîyêka rûmetêne û muxalefetê demokratîkî bikerê. Ma do serra 2021î bikerê serra azadîye. Ma serra newîye ya şar, bawerî, kedkar, cinî û ciwananê ke têkoşînê têdûştî, azadî û edaletî geş kenê fîraz kenê.''