Heyetê Rayberdişê Merkezê Partîya Demokratîke ya Şaran (HDP) bi wesîleya 1ê Teşrîna Peyêne Roja Kobanê ya Dinya eşkerayîyêke daye û bale ante nê nuqtayan ser:

''Şarê Kobanê 6 serrî cuwa ver vera barbarîya DAÎŞî ke heme dinya tersnayêne, têna semedê estbîyayîş, nasname û ameyoxê xo nê, eynî wextî de semedê pawitişê meridmîya azade 133 rojî xoverdayîşo destankî ramojna. DAÎŞo ke sereyê dinya rê bibê bela Kobanê de vînî kerd. Xoverdayîşê Kobanê hetê fîzîkî ra peynîya DAÎŞî arde.

Şaranê dinya şahîde kerd ke ciwan û cinîyan ê kurdan senî merg girewt çime û têkoşîn kerd. Bado ke 7î ra heta 70î şar semedê pawitişê anorê xo têkoşîn aver berd 2014 de 1ê Teşrîna Peyêne sey Roja Kobanê ya Dinya ameye îlankerdene. Her hetê dinya ra şarî semedê paştdayîşê Kobanê wiriştî payan ser. Ma sey HDPyî serrgêra ci ya 6. de xoverdayîşo ke tarîtîya DAÎŞî dirnaye û ameyox roşn kerd, ruhê paştdayîşê enternasyonalistî yê şaranê dinya selam kenê.

DAÎŞî Kobanê de vînî kerd la zîhnîyetê ci yo tarî hema estbîyayîşê xo rayra beno. No xoverdayîşo tarîxî hema nêqedîyayo. Zîhnîyetê DAÎŞî her firset de hêrişê fikrê azadî keno. Cipêrsayîşê Kobanê ke badê 6 serran vera partîya ma ame  destpêkerdene, ma senî ke verî zî vat, operasyonê qesasî yo. Cunku kêfê îqtîdarî yê ‚ Kobanê kewt, do bikewo‘ qirika înan de mend. Seba ke Kobanê de şarî û îtîqatî pîya ciwîyenê, seba ke şorişê Rojawanî şorişê cinîyan o, hêrişê ci kenê. Sere de sîstemê hemserekîye, Wezîrîya Cînîyanî, Jînwar, komun û kooperatîfê cinîyan îqtîdarê camêrdan tersneno. Ê çend hêriş bikerê hende do vînî bikerê. Xoverdayîşê şaran ê vera zîhnîyetê DAÎŞî do dewam bikero. Ma reyna na Roja Paştdayîşê Kobanê ya Dinya pîroz kenê û semedê pîlkerdişê têkoşînî veng danê.''