Heyetê Rayberdişê Merkezî yê HDPyî derheqê Qirkerdişê Sînemaya Amûdê de eşkerayîyêke daye ke Sînemaya Amûdê de tewr tay 250 domanî ameybî kiştene.

Eşkerayîya HDPyî wina ya:

''13ê teşrîna peyêne ya 1960î de şaristanê Amûdê ya Rojawanî de nêzdîyê 500 domanê kurdî emrê xo de reya verêne şîbî sînema. La wexto ke domanan sînemaya Şehrazade de fîlmê Cerimet Nifis El Leylo ke derheqê şerê xoserîye yê Cezayîrî de bi, seyr kerdêne perdeyê sînema ame vêşnayene û şewatêko pîl qewimîya. Semedo ke berê salona sînema hetê leşkeran ra amebî girewtene û destûr nêdîya ke şewat bêro hewnakerdene qirkerdişêko pîl ê vera domanan ame amadekerdene. Netîceya şewatî de sînema de zafêrê înan 12 serre ra qijêrî tewr tay 250 domanî vêşayî û qir bîyî.

Rixmo ke qirkerdişî ra 60 serrî derbaz bîyî no serebût hema zî nêame roşnîkerdene. Hukmatê Sûrîye pê qedexeyê yadkerdişî yê qurbanan polîtîkaya girane ya teda û zulmî arde ca û xîret kerd ke serebût vîran ra şoro.

Qirkerdişê Sînemaya  Amûde netîceya polîtîkaya dişmenîye ya vera domananê kurdan de qewimîya. Polîtîkayê asîmîlasyonî, bênasname veradayîşî û wareyanê xo ra vetişê domanan ê kurdan Sînemaya Amûdê de ameyî îsbatkerdene. No qirkerdişo ke nîşaneya tedaya vera kurdan a, ma reyna nê şermezar kenê û veng danê ke wa berpirsîyarî bêrê hukmkerdene.

Şarê Rojawanî û roniştoxê Amûdê seba ke no qirkerdiş reyna nêro kerdene têkoşîn kenê û vera polîtîkayanê dişmenê merdimîye cuye pawenê.''