Heyetê Rayberdişê Merkezî yê HDPyî bi wesîleya Roja Kobanê ya Dinya ya 1ê Teşrîna Peyêne eşkerayîyêke daye.

HDPyî vist bîrî ke şarê Kobanê 133 rojan vera barbarî, wehşîtî û qirkerîya DAÎŞî bi hawayêkê hemparî şaranê dinya û hêzanê mîyanneteweyîyan reyde xo ver da û erjê merdimîye pawitî. HDPyî ard ziwan ke Xoverdayîşê Kobanê bi serewedaritişê wijdanê pêro şaran û vengdayîşan ser o 2014 de 1ê Teşrîna Peyêne sey  'Roja Paştdayîşê bi Kobanê' ame îlankerdene.

HDPyî îfade kerd ke ê paştdayîş, xoverdayîş û serkewtişê Kobanê selam kenê û vat: ''Hişmendîya DAÎŞî hema zî dewam kena. Gefê îşxalî yê îqtîdarê AKPyî, dewaya qefilnayîşê partîya ma na hişmendîye eşkera kenê.

DAÎŞ vizêr ser nêkewt. Ewro zî ê hêzê ke wazenê Kobanê îşxal bikerê do ser nêkewê. Serfîrazîya Kobanê ya bi paştdayîşê mîyanneteweyî îlhamê merdimîye yo. Şorişê Kobanê şorişê cinîyan, ciwanan û şaran o. Vera hişmendîya tekpereste, serkewtişê zafrengî yo.

Roja Kobanê pêro merdimîye rê fîraz ba. Sey vizêrî ewro zî vera tarîtî, îşxalî û zordetîye ma hetê heq û raştîye de yê û paştî danê şaranê xoverdayoxan. Sey vizêrî ewro zî ma gefanê vera Kobanê qebul nêkenê û ma venga pêro dinya danê ke paştî bida Kobanê.''